Ol respýblıkada satylatyn farmasevtıka ónimderi baǵalaryn yryqtandyryp otyrýǵa qyzmet etedi. Densaýlyq saqtaý jáne áleýmettik damý mınıstrligi formýlıardy aldaǵy mamyr aıynyń basynda iske qospaqshy.
Bul vedomstvo basshysy Tamara Dúısenovanyń farmassosıasııalar ókilderimen memorandýmǵa qol qoıý rásimi ótip jatqan kezde belgili boldy.
Jańa qujatqa sáıkes, 105 túrli dári-dármektiń baǵalary burynǵy qalyptarynda ustalyp turatyny atap kórsetildi. «Biz Qazaqstannyń ulttyq dári-dármek formýlıaryn jasadyq. Ol ótken jylǵy qarasha aıynan beri bizdiń saıtymyzda ilýli turdy. Formýlıardy jasaýǵa barlyq medısınalyq uıymdar atsalysty. Endi 1 mamyr kúni biz ony óndiristik eksplýatasııaǵa qospaqshymyz», – dedi mınıstr.
Vedomstvo basshysynyń atap kórsetkenindeı, endi elimizdegi dárigerler, medbıkeler, stomatologtar, medısınalyq oqý oryndarynyń stýdentteri men basqa da medısınalyq qyzmetkerler úshin dári-dármekterdi tańdap alý men qoldanýda atalmysh formýlıardy basshylyqqa alatyn bolady.
Jobalyq nusqaǵa kepildi tegin medısınalyq kómek kórsetý sheńberinde satyp alynatyn dári-dármekterdiń tizimi engizilgen. Bul tizimde qazirgi tańda Qazaqstannyń naryǵynda aınalymda júrgen dári-dármektiń barlyq túri bar.
Mınıstr formýlıarǵa dáleldi klınıkalyq bazasy bar dári-dármekter tizimi kirgenin erekshe atap ótti. Sonymen birge, bul tizim kún saıyn farmasevtik assosıasııalar men halyqaralyq kitaphanalardyń taldaýynan ótip turady.
Murat AITQOJA.