Saıramdaǵy №4 balalar úıi oblystyq sottyń qamqorlyǵynda. Ár mereke saıyn sot ujymy balalar úıine baryp, jaýtańkóz botaqandardy quttyqtap, syılyqtar úlestiredi.
Ońtústiktiń sýdıalar qaýymdastyǵy Tóle bı aýdanyndaǵy taý bókterinde ornalasqan «Almataý» demalys aımaǵynda naýryz merekesin ótkizgende balalar úıiniń 100-ge jýyq jasóspirimderin qonaqqa shaqyrǵan eken.
– Eshkim Jaratqannan óz taǵdyryn surap almaıdy, – deıdi oblystyq sottyń tóraǵasy Nurserik Sháripov. – Áke-sheshesi bar, bolǵan-tolǵan balalardan bulardyń esh kemdigi joq. Aıyrmashylyǵy sol, bul balalarǵa áke-shesheniń aıaly alaqany, azamattardyń ystyq yqylasy, meıirim shuǵylasy jetise bermeıdi.
Bul kúni oblystyq jáne aýdandyq sottardyń sýdıalary men mamandarynan quralǵan 9 komanda óner jarystyrdy. «Úzdik ujym», «Úzdik sahnalyq qoıylym», «Úzdik oryndaýshy», «Úzdik bı», «Úzdik top» atalymdary boıynsha baıqaýǵa qatysyp, baqtaryn synady.
Merekelik sharaǵa balalar úıiniń 100-ge jýyq jetkinshekteri qatysty. Aǵa býynnyń ózderine degen ystyq yqylasyna, ákelik meıirimine razy bolǵan tárbıelenýshiler sóz alyp, alǵystaryn aıtty.
Kesh sońynda baıqaý qorytyndysy shyǵarylyp, Saıramdaǵy №4 balalar úıiniń ujymy «Jeńimpaz top» nomınasııasyna ıe boldy. Olarǵa sýdıalar qaýymdastyǵy atynan úı kınoteatry tabys etildi.
Baqtııar TAIJAN,
«Egemen Qazaqstan».