Qaýipti dertke qarsy taǵy bir amal

Qostanaıda onkologııalyq emhana ashyldy. Buryn emhana men dıspanser bir ǵımarattyń ishinde ornalasqandyqtan, naýqastarǵa asa qolaıly bolmaıtyn. Onda dárigerler kúnine 70 adamnyń ornyna 300 adamdy qabyldaıtyn. Endi jańa emhananyń qýatty­lyǵy da osynsha naýqasty qa­byl­daýǵa laıyqtaldy. Emha­nanyń alty qabaty da zamanaý­ı medısınalyq qural-jab­dyq­tarmen jabdyqtalǵan. Olar Germanııadan, Japonııadan, Re­seıden ákelindi. Arasynda qazaq­standyq jabdyqtar da bar. Emhananyń jańa ǵımaraty onkologııalyq dıspansermen jal­ǵastyrylǵan. Tipti, emhananyń syrtynan arbada otyrǵan, jalpy, júrýi qıyn jandardyń joǵary qabattarǵa kóterilýi úshin arnaıy kótergish te salynǵan. – Jańa emhanada naýqastarǵa emha­nalyq qyzmettiń barly­ǵy kórsetiledi. Munda endosko­pııalyq bólimshe, oǵan qosa bar­lyq zerthanalar, sáýle dıagnos­tıkasy bólimi ornalasqan. Naý­qas­tarǵa da, dárigerlerge de óte qolaıly jaǵdaı jasalǵan, – deıdi emhananyń bas dárigeri Elik Dosjanov. Bas dárigerdiń aıtýynsha, Qostanaı óńiri qaterli aýrýǵa shaldyqqandar sany jóninen elimizde aldyńǵy oryndardyń birinen sanalady. «Qazaqstanda onkologııalyq kómekti damytý» baǵdarlamasy iske qosylǵan 2012 jyldan beri Qostanaı oblysynda obyrdan opat bolǵandar sany ár myń adamǵa shaqqanda 109-dan 95,4 adamǵa deıin azaıdy. Aýrýdyń bastapqy satysynda anyqtalýy sońǵy bes jylda 30 paıyzǵa artty. Al bes jáne odan da kóp jyl ómir súretinder sany 49,6-dan 51,9 paıyzǵa deıin ósti. Oblystyq densaýlyq saqtaý basqarmasynyń málimetine júginsek, jyl saıyn 130 myń adam onkologııalyq aýrýlarǵa qarsy skrıngten ótkiziledi. Oblys ákimi Arhımed Muham­betov jańa onkologııalyq emhanany aralap kórdi. Ol emhana ujymymen kezdesip, jańa qonysqa qutty bolsyn aıtty. – Onkologııalyq dıspanserdi qarjylandyrý jyl saıyn jaqsaryp keledi. Eger 2012 jyly oblysta densaýlyq saqtaýdyń osy salasyna bıýdjetten 900 mıllıon teńgeden sál asatyn qarjy bólinse, bıyl ol 2,5 mıllıard teńgege jetkizildi, – dedi Arhımed Begejanuly. Aımaq basshysy oblystyq densaýlyq saqtaý basqarmasy basshysy men emhananyń bas dárigerine oblys boıynsha kadr máselesin jaqsartýdy tapsyrdy. Oblystyń kóptegen aýdandarynda onkolog dáriger joq. Onkologııalyq jańa emhana adam ómirin uzartý men saq­taý jolynda obyrǵa qarsy taǵy bir amal ekeni aıqyn. Ol adam­dardyń erte bastan kórinip, profılaktıkalyq sharalardy júzege asyrýyn qalyptastyrýǵa, «aýrýǵa em izdegenshe, aýyrmaıtyn jol izdeýine» de qyzmet etetin bolady. Názıra JÁRIMBETOVA, «Egemen Qazaqstan». QOSTANAI.