Jeti – qasıetti san

О́tken dúısenbi kúni keshki sa­ǵat jetide Atyraýdan Oral áýe­jaıyna jetinshi qysqy Azııa oı­yndarynyń alaýy kelip jetti. Buǵan deıin Qazaqstannyń alty qalasyn aralap ótken alaýdy jetinshi bolyp qarsy alý baqyty ba­tysqazaqstandyqtarǵa buıyr­dy. Jeti halqymyzdyń uǵymy men nanym-túsiniginde kıeli ári qasıetti san. Muny alaý esta­fe­tasy ókilderin jyly júzben qar­sy alǵan qala jurtshylyǵy men óńirdiń sportsúıer qaýymy jaq­sy yrymǵa jorydy. Aqjaıyqqa aıaldaǵan Azıada alaýynyń jeti sanyna qatysty tustary tek osymen tusalmaıdy. Alaý qutysyn alyp júgir­gen­der­diń baǵyty Jaıyq jaǵasyndaǵy Jeńis alańyn qosa eseptegende Or­al qalasynyń artyq ta emes, kem de emes tup-týra jeti kóshe­sin qamtydy. Bular Pýgachev, Dos­tyq, Eýrazııa, Qurmanǵazy, Mán­shúk Mámetova jáne Yqsanov kó­sheleri. Ne de bolsa, estafetany jeti sanyna týralaıyq degen oı ony uıymdastyrýshylardyń úsh uıyqtasa tústerine de kirmepti. Muny sáıkestilik deısiz be, tilek­terdiń toǵysýy deısiz be, qalaı deseńiz de jeti sany Aqjaıyqqa aıaq basqan Azıada alaýynyń enshisindeı kórindi. Osy mereıli sharaǵa baıla­nys­ty Jaıyq jaǵalaýyndaǵy Je­ńis alańyna jınalǵan myńda­ǵan qala turǵyndary aldynda Batys Qazaqstan oblysynyń áki­mi Baqtyqoja Izmuhambetov qut­tyq­taý tilegin bylaısha jetkizdi. – Birneshe ǵasyrlyq tarıhy bar Qazaq eliniń kóne de jańa qalasy Oralda aq Olımpııa alaýy tuńǵysh ret tutanyp otyr. Astana men Almatydaǵy qysqy Azııa oıyndarynyń ashylýyna sanaýly kúnder qaldy. Bul tek sportsúıer qaýym ǵana emes, barlyq respýblıka jurtshylyǵy úshin óte jaýapty shaq. Halqymyz ben ór­kenıetter arasyndaǵy ózara túsi­nistikti sport arqyly tereńde­týge bolady. Bul rette tórimizge engeli otyrǵan Azıada oıyndary da eleýli ról atqarmaq. Iske sát! Budan soń saltanatty sherýdi bastaý úshin ortaǵa alaý saqshy­la­ry shaqyryldy. Alaý estafetasy dıreksııasy basshysynyń oryn­ba­sary Sársen Quranbek alaý ja­ǵylǵan qutyny Batys Qazaqstan oblysynyń ákimi Baqtyqoja Iz­mu­hambetovke tapsyrdy. Sol sát­te ol sahna tuǵyrynan tústi de, alaýdy alyp belgilengen baǵyt boıynsha Pýgachev kóshesiniń bo­ıymen júgire jóneldi. Oblys bas­shysy esta­feta­ny budan soń belgilengen qa­shyqtyqta ózin kútip turǵan Ba­tys Qazaqstan oblysynyń proký­ro­ry Jaqsylyq Baıtuqbaevqa ber­di. Alaý sherýshileri osydan soń birine-biri jal­ǵasyp kete bardy. Túske deıin jáne tústen keıin ótkizilgen alaý estafetasynyń eki kezeńine 60 alaýger qatysyp, 12 shaqyrymdy júgirip ótti. Ol­ardyń arasynda sportshylar men óner juldyzdary, mádenıet qaı­ratkerleri, saıasatkerler men bıýdjet qyzmetkerleri bar. Alaý­ger­lerdiń arasynan biz qazaqtyń aq­yn qyzy Aqushtap Baqtyge­re­eva men ánshi-kompozıtor, Qazaq­stan­nyń halyq ártisi Eskendir Ha­san­ǵalıevti kezdestirip qal­dyq. Apa­myz ben aǵamyz kóńildi. Jas­tar­ǵa jaqsy tilekterin aıtyp jatyr. Alaý estafetasynyń qoryt­yn­­dysy keshke muz sporty saraı­yn­da ótti. Ol sándi de mándi, kórikti de kelisti, asqaq ta aıshyqty merekege aınaldy. Onyń osyndaı bıik talǵam deńgeıinde uıym­das­tyrylýyna Batys Qazaqstan ob­lys­tyq sport jáne deneshynyq­tyrý basqarmasynyń bastyǵy Mú­silim Ońdaǵanovtyń úlken úl­es qosqanyn aıta ketken jón. Qazaqstannyń jetinshi qalasynda ótkizilgen alaý estafetasynyń sońy sambo kúresinen birneshe dúrkin Azııa chempıony, álem kýbogy kezeńiniń jeńimpazy Medet Ońdaǵanovtyń qolyna tıdi. Ol muz alańyn aınalyp ótip alaýqutyny jaqty. Aqjaıyqqa alaý estafetasy kelgen kúni bıylǵy qysta tuń­ǵysh ret aqsha qar jaýyp turǵyn­dardy qýanyshqa keneltti. Bul ol­ardyń kópten kútip júrgen qary edi. Iıa, bul jaı Azıada emes, aq Azıada ǵoı. Endeshe, munyń da jeti sany sekildi óte jaqsy ny­shan ekenine talas bolmasa kerek. Temir QUSAIYN. Batys Qazaqstan oblysy. ––––––––––––––––––– Sýretti túsirgen Rafhat HALELOV.