Almaty , 2016 jylǵy 21 sáýir
«Bokstan áıelder arasyndaǵy álem chempıonaty.
Astana 2016» eskertkish monetalaryn aınalysqa shyǵarý týraly
«Qazaqstan Respýblıkasynyń Ulttyq Banki týraly» 1995 jylǵy 30 naýryzdaǵy Qazaqstan Respýblıkasynyń № 2155 Zańyna sáıkes Qazaqstan Respýblıkasynyń Ulttyq Banki 2016 jylǵy 21 sáýirde nomınaldyq quny 100 teńgelik, «rroof» sapaly kúmisten «Bokstan áıelder arasyndaǵy álem chempıonaty. Astana 2016» eskertkish kúmis monetalaryn aınalysqa shyǵarady.
Monetanyń sıpattamasy:
Monetanyń bet jaǵynda (aversinde) joǵarǵy bóliginde ulttyq oıý-órnek aıasynda monetanyń nomınalyn bildiretin «100 TEŃGE» degen jazý jáne moneta daıyndalǵan metaldy, onyń synamyn jáne massasyn bildiretin «Ag 925 24 g» degen jazý, sondaı-aq Qazaqstan teńge saraıynyń taýar belgisi ornalasqan. Monetanyń tómengi bóliginde stadıonnyń stıldendirilgen beınesiniń jáne memlekettik tildegi «Qazaqstan Respýblıkasy» degen jazýdyń qorshaýynda Qazaqstan Respýblıkasynyń eltańbasy, soǵylǵan jylyn bildiretin «2016» degen jazý beınelengen. Beıneler men jazýlar bederlengen.
Monetanyń syrt jaǵynda (reversinde) Astana qalasynda ótkiziletin bokstan áıelder arasyndaǵy álem chempıonatynyń resmı emblemasy beınelengen. Boıaýy tampomór tehnologııasy arqyly berilgen. Aınaldyra shyǵyńqy jıek júrgizilgen.
Qyry (gýrty) tegis, bederi men jazýy joq.
Moneta 925 synamdy kúmisten jasalǵan, massasy – 24 gramm, tik buryshy 30h45 mm, daıyndaý sapasy – «proof», taralymy – 1 myń dana.
Nomınaldyq quny 100 teńgelik eskertkish monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq bank shottaryna esepteý úshin jáne aýdarym jasaý úshin qabyldanýǵa mindetti, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady.
Qazaqstan Respýblıkasy Ulttyq Bankiniń osy resmı habarǵa túsindirmesi
«Bokstan áıelder arasyndaǵy álem chempıonaty. Astana 2016» monetasynyń dızaıny osy chempıonattyń resmı emblemasyn paıdalana otyryp Qazaqstan Respýblıkasy Prezıdentiniń 2003 jylǵy 25 qyrkúıektegi № 1193 Jarlyǵymen bekitilgen Qazaqstan teńgesi – ulttyq valıýta banknottary men monetalary dızaınynyń tujyrymdamasyna sáıkes ázirlengen.
«Proof» sapasymen jasalǵan eskertkish kúmis monetalar kolleksııalyq quny boıynsha satýǵa arnalǵan. Olar kádesyılyq oraýmen shyǵarylady jáne Qazaqstan Respýblıkasy Ulttyq Bankiniń memlekettik, orys jáne aǵylshyn tilderindegi nómirlik sapa sertıfıkatymen jabdyqtalǵan.
Monetalardyń búkil 1000 dana taralymyn Qazaqstan boks federasııasy satyp alady.