Kapıtalızm ornap, demokratııa saltanat qurǵaly árkim óziniń oıyn ashyq aıtyp, baılam-paıymdaryn jasqanbaı ortaǵa salatyn «ádet» qalyptasty. Bul basqany qoıyp qasıetti tilimizge ár qyrynan áserin tıgizýde. О́zi túsinetin, estigen sózdi mán-maǵynasyna qaramaı ońdy-soldy qoldaný úrdisi etek alyp barady. Ulylar qalyptastyrǵan zańdylyqty ysyryp, keı kezde, kórinip qalý úshin be, bolsyn-bolmasyn kóterińki estiletin uǵymdy bas árippen jazatyn boldyq. Bul bank júıesinde «ornyǵyp» barady.
Jaqynda bir áriptesimiz Qabatovtyń ázilin ekrannan kórsetip, qazaq tilinde dıalekt bar degendi aıtyp qaldy. Shyndyǵyna kelgende, qazaq tilinde dıalekt joq. Ony ǵalymdar baıaǵyda dáleldegen. Eger bola qalsa, sol dıalektiniń «avtorlary» til qadirin bilmeıtin, zańdylyqty elemeıtin til buzarlar dep bilemiz. Sońǵy aıtar túıinimiz, qazaqtyń mańdaıyna bitken jaryq juldyzy, bolmysy bólek naǵyz tuǵyrly tulǵasy Qanyshtaı uly ǵalymnyń tegin birde Sátbaev, birde Sátpaev dep jazyp júrmiz. Buǵan til zańdaryn qadaǵalap otyrǵan tıisti mekemeler, til qudiretin zerttep-zerdelep júrgen ǵalymdar ne der eken?
Eldik iste, ulttyq qyzmette eleýsiz eshnárse bolmaıdy. Ineniń jasýyndaı qate kezdese qalsa, ár qazaq ıilip turyp halyqtyq qalypqa salýy qajet. Erkindikti erkelik dep uqpaǵan jón. Sonymen, bir áripti jónge salýdyń ózi syn bolyp turǵandaı. Mundaı áttegenaılar ár jerde kezdesip qalady. Bul úlkenderge joǵyna eleýsizdeý kóringen bir árip, bir sóz ul men qyzdy (ásirese, Ulttyq biryńǵaı testte) shatastyratyny aqıqat.
Súleımen MÁMET,
«Egemen Qazaqstan»