Ahmed MÝRADOV,
Parlament Májilisiniń depýtaty, «Vaınah» cheshen-ıngýsh qaýymdastyǵynyń tóraǵasy:
– Elbasy óziniń «Qazaqstan-2050» Strategııasynda alda kútip turǵan ekonomıkalyq, geosaıası, energetıkalyq, azyq-túlik jáne taǵy basqa ózekti máselelerge qatysty jahandyq syn-qaterlerdi atap kórsetken bolatyn. Búginde sol keleńsizdikterge kezigip otyrmyz. Degenmen, atalǵan syn-qaterlerdi eńserýge Qazaqstannyń múmkindigi tolyq jetedi. Sebebi, bizdiń kórshi memleketterge qaraǵandaǵy daıyndyq deńgeıimiz aıtarlyqtaı joǵary.
Kez kelgen jaǵdaıda halyqtyń aýyzbirshiligi, eldiń tutastyǵy erekshe ról atqaratyny belgili. Bul turǵyda da Qazaqstan ózge elderden oq boıy ozyq tur. Judyryqtaı jumylǵan halyq qana kez kelgen qıyndyqqa moıymaı, tótep beredi.
Sonymen qatar, Qazaqstan álemdik syn-qaterlerdiń aldyn alý maqsatynda «100 naqty qadam» Ult Josparyn bekitti. Atalǵan basym-baǵyttardyń júzege asýynda Qazaqstan halqy Assambleıasynyń da ózindik úlesi bar. О́ıtkeni, birligi men yntymaǵy jarasqan el ǵana aldyna aıqyn maqsattar qoıyp, soǵan jetý jolynda áreket etedi.
Men Assambleıanyń qurylýyn 25 jyldyń ishinde qol jetkizgen negizgi jetistikterimizdiń biri dep baǵalaımyn. Sebebi, dini men diline, tili men dástúrine qaramastan, barlyq halyqtyń basyn bir shańyraqtyń astyna jıyp, ortaq maqsat úshin «bir jeńnen qol, bir jaǵadan bas» shyǵaryp áreket etý qazirgideı geosaıası turaqsyzdyq kezinde kóp qajyr-qaıratty qajet etetin aýqymdy jumys. Osy rette birinshi kezekte óz jerinde turaqtylyq pen toleranttylyqtyń saqtalýyna barlyq jaǵdaıdy jasap otyrǵan qazaq halqyna alǵys aıtýymyz kerek.
Assambleıa biz sııaqty ózge ult ókilderine ózimizdiń Qazaqstan memleketiniń bir bólshegi ekenimizdi jáne osy memleketke kerektigimizdi sezinýge múmkindik berdi. Sondaı-aq, ózimniń Qazaqstanǵa muqtaj ekenimdi sezindim. Al osyndaı birligi myǵym, yrys-berekesi tasyǵan eldiń barlyq syn-qaterdi eńserýge qaýqarly bolary daýsyz.
Aleksandr BARON,
«Mısva» evreı ulttyq uıymy qaýymdastyǵynyń tóraǵasy,
Qazaqstan halqy Assambleıasy Keńesiniń múshesi:
– «100 naqty qadam» Ult Josparynda Memleket basshysy birtektilik pen birlik taqyryby boıynsha negizgi basym baǵyttardy kórsetip berdi. Sonyń ishinde Qazaqstan halqy Assambleıasynyń «Úlken el – úlken otbasy» jáne azamattyq birtektilikti nyǵaıtý maqsatynda «Meniń elim» keń kólemdi jobalaryn ázirlep, júzege asyrý tapsyrylǵany belgili.
Búgingi shara atalǵan tapsyrmalardyń aıasynda atqarylyp jatqan jumystardyń bir satysy. Atap aıtqanda, Ulttyq mýzeıdegi «Qazaqstan halqy Assambleıasynyń jáne Qazaqstannyń polıetnıkalyq tarıhy» atty zaldyń ashylýynyń astarynda úlken mán bar. Bul jerde qazaq dalasyna qonys aýdarǵan halyqtardyń tarıhynan bastap, olardyń búgingi dostyǵy, tatýlyǵy, salt-dástúri nasıhattalady. Árıne, bir týdyń astynda osynsha ult ókilderiniń tatý-tátti ómir súrýin bir ǵana zalmen qamtý múmkin emes. Sondyqtan, aldaǵy ýaqytta bul jumystardyń aıasy keńeıedi dep oılaımyn.
Bizdiń bul áreketimizdiń eń basty maqsaty – kezdesetin ekonomıkalyq daǵdarystar men ártúrli qıyndyqtardy birge eńserip, Qazaqstannyń kórkeıýi jolynda kúshimizdi biriktirý. Mundaı birtektiliktiń geosaıası jaǵdaı ýshyqqan qazirgi jaǵdaıda mańyzy zor.
Iýrıı BÝNAKOV,
Qazaqstan halqy Assambleıasy janyndaǵy Orys qoǵamdastyǵynyń basshysy:
– Men Qazaqstan halqy Assambleıasynda qurylǵan kúnnen bastap jumys istep kelemin. Sondyqtan, onyń qabyrǵasynda bolatyn ár oqıǵa men úshin asa mańyzdy.
Jalpy, osyndaı uıymdy qurý, jumysyn júrgizý, halyqtardyń basyn bir arnaǵa toǵystyryp, ortaq maqsatqa umtyldyrý kóregendilikti qajet etedi. Osyndaı aýqymdy ári biregeı jobany júzege asyrǵany úshin Elbasyna sheksiz alǵysymdy bildirgim keledi.
Assambleıa qurylǵan alǵashqy jyldarda Memleket basshysynyń «Eger halyqtardyń dostyǵyn saqtaı almasaq, eldiń gúldenýi týraly sóz qozǵaýdyń ózi artyq» degeni bar. Sol sebepti de Assambleıanyń jumysyn Prezıdentimiz ózi tikeleı qadaǵalap, baǵyt-baǵdar berip otyr.
Búgingi álemde bolyp jatqan saıası jáne ekonomıkalyq jaǵdaılarǵa qatysty aıtar bolsaq, bizdiń birligimizdiń sol keleńsizdikterge tótep beretin joıqyn kúsh ekenin atap ótkim keledi. Sebebi, birligi jarasqan eldiń erteńi jarqyn. Osy rette búgin bolatyn Qazaqstan halqy Assambleıasynyń kezekti sessııasyna erekshe nazar aýdarǵanymyz jón. О́ıtkeni, bul basqosýda Elbasynyń júktegen mindetteri men tapsyrmalarynyń oryndalý barysy talqylanyp, aldaǵy ýaqytta atqaratyn naqty is-áreketimiz aıqyndalady.
Jazyp alǵan
Elaman QOŃYR,
«Egemen Qazaqtan»
Sýretterdi túsirgen Erlan OMAROV