1913 jyly týǵan Aısha Dáribekova oblystyq kardıologııalyq ortalyqqa «Jedel járdemniń» kómegimen bıylǵy 20 sáýirde tańǵy saǵat 5-ten asqanda jedel mıokard ınfarkt dıagnozymen shuǵyl jetkiziledi. Sodan keıin keıýananyń ómirin saqtap qalý úshin arpalys bastaldy. Naýqas jansaqtaý bólimine jatqyzylyp, dárigerler emdik sharalarǵa birden kiristi.
Jan-jaqty tekserýdiń nátıjesinde syrqattyń syry da lezde anyqtaldy. Júrek-qan tamyrlarynyń ishindegi túıirshekterdi eritý maqsatynda trombolıtıkalyq dári jiberilip, jedel túrde tamyrishilik endosvaskýlıarlyq jolmen qan tamyryna stent qoıý otasy jasaldy. Sóıtip, oblystyq kardıoortalyq qyzmetkerleri 103 jastaǵy qarııanyń ómir jasyn uzartýǵa septigin tıgizdi.
Atalmysh kardıoortalyqtyń bas dárigeri Spandııar Bekjigitov jáne orynbasary Gúlmıra Álipova jýrnalısterge arnap ótkizgen baspasóz máslıhatynda osy jaıttardy tilge tıek etti. BAQ ókilderin pasıentpen júzdestirip, operasııa blogyna kirgizdi.
– Qazir qaýiptiń beti qaıtqannan soń Aısha Dáribaevanyń densaýlyǵy birqalypty. Kóńil kúıi de kóterińki. Bizdiń aýrýhanada buryn 95 jastaǵy naýqasqa operasııa jasalǵan bolatyn. Endi, mine, 103-ke kelgen ájege jasalǵan ota da oıdaǵydaı ótti. Biz endovaskýlıarlyq stentteý otasyn jasaýda naýqastyń jasyna eshqandaı shekteý qoıylmaıtynyn basa aıtqymyz keledi, – deıdi bas dáriger.
– Qudaıdyń munysyna da shúkir! Dárigerlerge analyq alǵysymdy aıtamyn. О́rkenderi óssin! – deıdi ǵasyrdan uzaq jasaǵan áje.
Serikqalı JEKSENBAEV
Ońtústik Qazaqstan oblysy