ASTANA. 28 sáýir. Qytaıdyń Shanhaı qalasynda qaıtys bolǵan jandardy jerleýdiń jańa tásili shyqty. Iаǵnı, baqılyq bolǵan adamnyń múrdesi órtelip, kúlli bıologııalyq tyńaıtqyshqa aınalyp ketetin ydysqa salynady. Bul týraly 24.kz-ke silteme jasaǵan egemen.kz tilshisi habarlady.
Jergilikti bılik múrdeni jerleýdiń jańa tásili qytaılyqtar úshin óte tıimdi ári arzan degendi aıtty. Al qaıtys bolǵan adamǵa úlken megapolıstegi zıratta oryn joq bolǵandyqtan, janaza shyǵarýmen aınalysatyn jergilikti bıýro qymbat emes ekologııalyq qyzmet túrin usynýda.
«Múrdeni atalǵan ydysqa salǵannan keıin onyń ústine gúl otyrǵyzýǵa bolady. Úsh aıdan keıin barlyǵy topyraqqa sińip ketedi», – dedi jerleý qyzmetin kórsetetin bıýro mamandary.
Qazirgi tańda Shanhaı bıligi turǵyndardy osy tásil arzan ári ekologııalyq taza dep úgitteýde. Tipti olar osy joldy tańdaǵan turǵyndarǵa aqshalaı jeńildik jasaıdy.
Búginde ekologııalyq jerleý tásilin 30 paıyz halyq quptaýda. О́ıtkeni, Qytaıda qaıtys bolǵan adamdy aqtyq saparǵa shyǵaryp salý tym qymbatqa túsedi.
Aıta keteıik, shanhaılyqtar úshin taǵy bir tásil bar. Jańa tehnologııa boıynsha súıekti órtep, kúlge emes, 150-deı shaǵyn krıstalǵa aınaldyryp, ony úıge saqtap qoıýǵa nemese alqa, syrǵanyń tasyn jasaýǵa bolady.
Talǵat Raıymbek.
Derek, foto: 24.kz.