Semeıdiń ákimin de iske qosty
Shyǵys Qazaqstan oblysyna qarasty Semeı shaharynda jylýdy paıdalanǵany úshin tólemaqy tólemegendermen kúrestiń tyń joly tabyldy. Qala ákimi Ermek Sálimov qoly qalt etkende boryshkerlerge habarlasyp, bereshekti tezirek qaıtarýdy ózi ótinetin bolypty. Al osy demalys kúnderi qala basshysy qońyraý shalǵan 15 turǵynnyń arasynda qaryzy 200 myń teńgege deıin jetkender bar.
Búginde qaladaǵy jylýǵa qaryzdyń jalpy kólemi – 600 mıllıon teńgege jýyq. Bul kórsetkish jaqyn arada tómendeýi tıis. Ákim habarlasqan semeılikterdiń basym bóligi qaryzdy 9 mamyr – Jeńis kúnine deıin tóleýge ýáde berip otyr.
– Keı turǵyndar ákimniń qońyraý soqqanyna tańdana qarasa, keıbir jandarǵa báribir, al kelesi bireýleri qaryz ekendikterin moıyndasa da tólemeıtindikterin aıtady. Al biz qaryzdy tezirek jınaýymyz kerek. Ýaqyt tyǵyz bolǵandyqtan, bul jumysqa men de kiristim, – deıdi qala ákimi Ermek Sálimov.
Dýman ANASh,
«Egemen Qazaqstan»
SEMEI