Kúıshi, halyqaralyq jáne respýblıkalyq baıqaýlardyń laýreaty Aıtolqyn Toqtaǵannyń Ulttyq mýzeıde ótken «Bulbul» leksııa-konserti Dına Nurpeıisovanyń 155 jyldyq mereıtoıyna arnaldy.
Kúı anasy Dınanyń mereıtoıy qurmetine oraı ótkizilgen sharada sóz sóılegen Ulttyq mýzeıdiń dırektory Darhan Myńbaı qudiretti kúı óneriniń keıingi jas býyny arasynda ózindik qoltańbasymen tanylǵan Aıtolqyn Toqtaǵannyń shyǵarmashylyq jolyna sáttilik tileı kelip: «Dına – keshegi halyq sazgerleriniń shyǵarmalaryn bizge deıin jetkizgen sheber oryndaýshy, Qurmanǵazynyń shákirti, qazaqtyń kúıshilik ónerine óshpes iz qaldyrǵan tulǵa. 8-9 jasynan bastap oryndalýy qıyn kúılerdi meńgerip alǵan desek, minekı, bizdiń óner jolynda júrgen talantty Aıtolqyndaı jastarymyz da osy anamyzdan qalǵan asyl murany jalǵastyrýshylar. Sondyqtan da, jas ónerpazdardyń shyǵarmashylyq shabytynyń sharyqtaı berýine tilektespin», – dedi.
Merekelik shara barysynda Aıtolqyn Toqtaǵan Dına Nurpeıisovanyń «Kógentúp», «Jańa bozsholaq», «On altynshy jyl», «Bulbul», t.b. kúılerin baıyrǵy úlgisimen, babyna keltire oryndady. Ár kúıdiń shyǵý tarıhy men tartylý ereksheligi jaıyndaǵy tushymdy áńgimeler kesh mazmunyn arttyrdy. Sonymen qatar, ónersúıer qaýym Qurmanǵazy, Táttimbet, Dáýletkereı, Baıjigit, Súgir, Seıtek syndy belgili halyq kompozıtorlarynyń týyndylaryna qanyqty.
Kúı keshin Qazaqstan Respýblıkasy Tuńǵysh Prezıdenti Qory syılyǵynyń laýreaty, dástúrli ánshi Erlan Rysqalı ásem ánimen áspettedi. Shara negizinen Ulttyq mýzeı janynan qurylǵan «Halyq qazynasy» ǵylymı-zertteý ınstıtýtynyń qazaq halqynyń dástúrli mýzykalyq ónerin jańǵyrtý men nasıhattaýǵa arnalǵan «Dástúrli mýzykalyq mura» baǵdarlamasy aıasynda uıymdastyrylǵanyn atap ótken jón.
«Egemen-aqparat»