L.N.Gýmılev atyndaǵy Eýrazııa ulttyq ýnıversıtetinde Qazaqstannyń eńbek sińirgen qaıratkeri, Qazaqstan Pedagogıkalyq ǵylymdar akademııasynyń akademıgi, pedagogıka ǵylymdarynyń doktory, professor Bolat Ábdikárimuly atyndaǵy aýdıtorııanyń ashylý saltanaty ótti.
Akademık Bolat Ábdikárimuly L.N.Gýmılev atyndaǵy Eýrazııa ulttyq ýnıversıtetinde pedagogıka kafedrasynyń meńgerýshisi bolyp 2 jyl qyzmet atqarǵan bolatyn. Jıynǵa kelgen qonaqtar abzal azamat, kórnekti ǵalym, ulaǵatty ustaz Bolat Ábdikárimulynyń bilim berý salasyndaǵy, sonyń ishinde jastardy tárbıeleýdegi eren eńbegi, adamı tulǵasy, bekzat bolmysy men bıik parasaty týraly estelikterin aıta kelip, sharanyń uıymdastyrylýyna muryndyq bolǵan azamattarǵa, atalǵan bilim ordasynyń basshylyǵyna júrekjardy alǵystaryn bildirdi. Sonymen qosa, ulaǵatty ustaz ómiriniń júrip ótken jolynan syr shertetin arnaıy fılm kórsetildi.
Ýnıversıtet rektory Erlan Sydyqovtyń kirispe sózinen keıin aıtysker aqyn Serikzat Dúısenǵazy arnaý aıtyp, kópshilik kóńilin bir serpiltip tastady. Atalǵan sharany EUÝ áleýmettik-mádenı damý jónindegi prorektory Dıhan Qamzabekuly júrgizip otyrdy. Sonymen qosa, ǵalym týraly sózdi alǵashqylardyń biri bolyp memleket jáne qoǵam qaıratkeri Ravıl Shyrdabaev, taǵy basqa zııaly qaýym ókilderi erekshe tolǵanyspen eske aldy. Is-shara sońy «Úlgili ómir: tulǵa, ustaz, ǵalym» atty ǵylymı-ádistemelik semınarǵa ulasty.
Semınarda L.N.Gýmılev atyndaǵy EUÝ Áleýmettik ǵylymdar fakýltetiniń dekany Baıjuman Qashqynbaı «Pedagog tulǵany tanytý», áleýmettik pedagogıka jáne ózin-ózi taný kafedrasynyń meńgerýshisi, professor Qadısha Shalǵynbaeva «Bolat Ábdikárimulynyń ǵylymı mektebi», pedagogıka ǵylymdarynyń doktory, professor Ǵalııabaný Kertaeva «Bolat Ábdikárimuly – kásiptik bilim berý maıtalmany», dosent Gúlden Aıqynbaeva «B.Ábdikárimuly – kásiptik-tehnıkalyq bilim berýdiń negizin qalaýshy» atty taqyrypta baıandamalar jasap, basqa da sóıleýshiler ónegeli ómir týraly keńinen tolǵady.
Atalmysh sharaǵa Bilim jáne ǵylym mınıstrliginiń ókilderi, Parlament depýtattary, belgili qoǵam qaıratkerleri, bilim berý mekemeleriniń basshylary, ǵalymdar, belgili qoǵam jáne memleket qaıratkeri Oralbaı Ábdikárimuly, Bolat Ábdikárimulynyń zaıyby, pedagogıka ǵylymdarynyń doktory, professor Tazagúl Muqashqyzy, balalary jáne shákirtteri qatysyp, ardaqty tulǵa jaıly jyly lebizderin bildirdi.
Raýshan TÁÝIRHANQYZY,
«Egemen Qazaqstan»