Memlekettik qyzmet isteri mınıstrliginde «Qazirgi zamanǵy sybaılas jemqorlyqqa qarsy kúres: tájirıbe men jetistikter» taqyrybynda ǵylymı-tájirıbelik konferensııa ótti.
Onyń jumysyna mınıstrlik basshylary, BUU Turaqty úılestirýshisiniń orynbasary, EQYU baǵdarlamasynyń Astanadaǵy keńsesiniń basshysy, dıplomatııalyq korpýstyń ókilderi, Parlament Májilisiniń depýtattary, Joǵarǵy Sot sýdıalary, mınıstrlik janyndaǵy Qoǵamdyq keńestiń músheleri, sonymen qatar, akademııalyq qoǵamdastyq, úkimettik emes uıymdar men BAQ ókilderi qatysty.
Sharany Memlekettik qyzmet isteri mınıstrligi, Memlekettik qyzmet jónindegi óńirlik hab jáne Germanııanyń halyqaralyq quqyqtyq yntymaqtastyq qory (IRZ) birlesip uıymdastyrdy.
Konferensııanyń jumysyna Sıngapýrdegi Lı Kýan Iý atyndaǵy memlekettik saıasat mektebiniń professory Mýkýl Asher, Grýzııanyń memlekettik qyzmet isteri jónindegi bıýrosynyń dırektory Temýr Chıharadze, Tómengi Saksonııanyń ádilet mınıstriniń orynbasary bolǵan Iýrgen Olerkıng jáne Germanııadaǵy qylmystyq polısııanyń federaldy basqarmasynyń vıse-prezıdenti bolǵan Iýrgen Maýrer, RǴA Fılosofııa men quqyq ınstıtýtynyń dırektory, Reseı Federasııasy prezıdentiniń janyndaǵy Sybaılas jemqorlyqqa qarsy is-qımyl jónindegi keńestiń múshesi, professor Vıktor Rýdenko qatysty.
Konferensııaǵa qatysýshylar jemqorlyqtyń aldyn alýdaǵy otandyq jáne halyqaralyq tájirıbeni zerdelep, Germanııa, Reseı, Sıngapýr jáne Grýzııa sııaqty elderdiń sybaılas jemqorlyqty joıý jónindegi tájirıbesin talqylady.
Qazaqstannyń sybaılas jemqorlyqqa qarsy kúres saıasatynyń negizgi basymdyqtary jaıly Memlekettik qyzmet isteri mınıstriniń orynbasary Aıgúl Shaıymova áńgimelep berdi.
«Egemen-aqparat»