Táýelsizdiktiń 25 jyldyǵyna oraı bastalǵan «25 ıgi is» aksııasyna Jarma jurty da úles qosyp keledi. Taıaýda aýdan ortalyǵy Qalbataýda memleket-jekemenshik áriptestigi negizindegi alǵashqy balabaqsha ashyldy. «Er-Dáýren» balabaqshasy – ózektiligi kún sanap artyp kele jatqan mektepke deıingi oqytý jáne tárbıe berý máselesin jergilikti bıliktiń kásipkerlerdi qatystyra otyryp sheshýge baǵyttalǵan jumystarynyń bir kórinisi. «Balapan» baǵdarlamasy aıasyndaǵy balabaqsha ǵımaratynyń ashylý saltanatyna ardagerler, ata-analar men turǵyndar qatysty.
– El egemendigin alǵan jyldardan beri aýdanda kóptegen jańa bilim ordalary, balabaqshalar boı kóterdi. Qalbataýdyń ózinde sońǵy bes jyl ishinde memleket qarajatyna «Altynaı» balabaqshasy salynyp, «Aıgólek» balabaqshasy qaıta jańǵyrtyldy. Qazir Qalbataý aýylynda 190-ǵa jýyq búldirshin balabaqsha kezeginde tur. Sondyqtan, jekemenshik balabaqshalardyń úlesin arttyrý jónindegi oblys ákiminiń tapsyrmasy boıynsha jerlesimiz Dáýlet Kóshenov jeke qarajatyna salǵan 90 oryndyq balbaqshany qoldanysqa berdi. Árıne, mundaı balabaqshany memlekettik bıýdjet esebinen salar bolsaq, shamamen 300 mln. teńge qarajat qajet bolar edi. Iаǵnı, memlekettiń qarajaty únemdelip otyr, dedi Jarma aýdanynyń ákimi Nurlan Sydyqov.
Sondaı-aq, aýdan basshysy Qalbataýdaǵy burynǵy «Kolosok» balabaqshasynyń ǵımaraty qaıta jańǵyrtylatynyn jetkizdi. Iаǵnı, aýdan ákimdigi men jeke kásipker Vıktor Isabaev arasyndaǵy kelisimshart boıynsha eski ǵımarat kásipker enshisine berilip, bıylǵy jyldyń 1 qyrkúıegine deıin bul nysan 100 búldirshinge arnalǵan balabaqsha retinde qoldanysqa enbek. Osylaısha, aǵymdaǵy jyly aýdan ortalyǵynda mektepke deıingi balalar tolyǵymen qamtylyp, balabaqsha máselesi túbegeıli sheshimin tabatyn bolady.
Balabaqshanyń alǵashqy búldirshinderine aýdan ákimdigi tarapynan syı-sııapat tartý etildi. Saltanatty sharada ata-analar atynan sóz alǵan Gúlfıra Sátpekova zaman talabyna saı salynǵan sáýletti de kópsalaly balabaqshada búldirshinderdiń tárbıe alýy ǵana emes, jan-jaqty damýyna mol múmkindik eskerilgendigin jetkizip, jańa nysannyń jumysyna tolaıym tabys tiledi.
Dýman ANASh,
«Egemen Qazaqstan»
Shyǵys Qazaqstan oblysy,
Jarma aýdany