Dıqanǵa beriletin sýbsıdııanyń tıimdiligi eskeriledi

Kóktemgi dala jumystaryna attanys aldynda Qostanaıda Aýyl sharýashylyǵy mınıstri Asyljan Mamytbekov pen oblys ákimi Arhımed Muhambetovtiń qatysýymen «Agrobıznes-2020» baǵdarlamasy sheńberinde agro­ónerkásip keshenin memleket tarapynan qoldaý máseleleri bo­ıynsha keńes ótti. Keńes bastalmas buryn Aýyl sharýashylyǵy mınıstri Qostanaı óńirindegi aýylsharýashylyq ónimderin óńdeý kásiporyndary uıym­dastyrǵan shaǵyn kórmeni aralap kórdi. Indýstrııalandyrý jyldarynan beri oblystyń aýyl sharýashylyǵy salasyndaǵy júzege asqan ınvestısııalyq jobalardyń arqasynda óńdeý kásiporyndary birshama damydy. Kórmede nan, shujyq, sút, kondıter ónimderi kórsetildi. Al búginge deıin oblystyń agroónerkásip salasynda quny 67 mıllıard teńge bolatyn 162 ınvestısııalyq joba ómirge joldama alyp, 3 myń jumys orny ashyldy. Salanyń eksporttyq áleýeti de artyp keledi. Osynyń barlyǵy memleket tarpynan jasalǵan qoldaýdyń arqasynda bolyp otyr. Mınıstrdiń oblysqa sapary kóktemgi dala jumystary bastalar shaqtyń qarsańynda bolǵandyqtan keńeste bul másele aldymen sóz boldy. Bıyl oblysta jalpy egis kólemi 4,700 mıllıon gektardy quraıdy. Onyń ishinde 3,7 mıllıon gektardy bıdaı alqaby alady. Maıly daqyldar 315 myń gektarǵa egiledi, 250 myń gektar malazyǵyndyq shópterge tıesili. Qostanaı óńirindegi bıylǵy dıqan kókteminiń jyl­daǵydan jańalyǵy da bar. Ol aldymen memleket tarapynan beriletin sýbsıdııaǵa baılanysty. Bıylǵy sýbsıdııanyń túri ózger­genmen, ol qarjy esh jaq­­qa ket­peıdi, báribir sol aýyl­­sha­rýashylyq taýar óndirý­shileri­ne qaıta beriledi. Buryn sýbsı­dııa dándi daqyldar úshin gektaryna beriletin. Endi ol ózgerip, ınvestısııalyq sıpat aldy, satyp alatyn tehnıka úshin tólenetin bolady. Eger dıqan bir tehnıka satyp alsa, onyń qunynyń 25 paıyzy sýbsıdııalanady. Munyń barlyǵy kóktemgi dala jumystary men kúzgi jıyn-terindi az ýaqyttyń ishinde atqarý maqsatynan týyndap otyr. Munyń tıimdiligi artyǵyraq bolady dep kútemiz. Munyń syrtynda tyńaıtqyshqa, gerbısıdke bólinetin sýbsıdııalardyń da kólemi ulǵaıdy, dedi Aýyl sharýashylyǵy mınıstri Asyljan Mamytbekov. Sonymen qatar, elimiz dıqandaryna kóktemgi dala jumystaryn atqarýǵa jeńil­­detilgen baǵamen janar-jaǵar­maı jáne jeńil­detilgen ústememen 60 mıllıard teńge nesıe berildi. Keńeste eginmen qatar mal sha­rýashylyǵy, veterınarlyq qyz­met­tiń jaqsartylýy, et ón­dirý, óńdeý máseleleri talqy­landy.  Názıra JÁRIMBETOVA, «Egemen Qazaqstan» QOSTANAI