Májilistiń Halyqaralyq ister, qorǵanys jáne qaýipsizdik komıtetiniń múshesi Baqytjan Ertaev pen Ekologııa máseleleri jáne tabıǵat paıdalaný komıtetiniń tóraǵasy Gleb Shegelskıı Katardan kelgen delegasııa múshelerimen kezdesti, dep habarlady osy palatanyń baspasóz qyzmeti.
Taraptar bul jyly júzdesýdi tarıhy tereń tamyrlastyqtan bastalǵan dostyq kezdesý retinde baǵalady. Al áńgime barysynda Qazaqstan men Katar arasyndaǵy qatynas jyl sanap qarqyndy damyp kele jatqany aıtyldy. Delegasııa jetekshisi, mýnısıpalıtet jáne qorshaǵan ortany qorǵaý mınıstri Muhammad Abdýllah Ál Rýmaıhı eki memleket arasyndaǵy yntymaqtastyq barlyq salada, ásirese, saıası baǵytta óte joǵary deńgeıde ekenin jáne bolashaqta da nyǵaıa túsetinin jetkizdi.
G.Shegelskıı delegasııa múshelerin ekologııa salasynda atqarylyp jatqan jumystarmen tanystyra kelip, Qazaqstan Prezıdentiniń endi ǵana «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń «jasyl ekonomıkaǵa» kóshýi máseleleri boıynsha ózgerister men tolyqtyrýlar engizý týraly» Zańǵa qol qoıǵanynan habardar etti. Osyǵan oraı, Katardyń keler jyly Astanada ótetin EKSPO-2017 halyqaralyq kórmesine belsene qatysatyndyǵyna senim bildirildi.
Komıtet tóraǵasy Elbasynyń halyqaralyq deńgeıdegi mańyzdy bastamalaryn sóz ete kelip, delegasııa jetekshisine «Álem. XXI ǵasyr» manıfesin tabys etti. Baqytjan Ertaev Qazaqstan Prezıdentiniń búkil álemdi beıbit ómirge úndeý jolyndaǵy batyl qadamdaryn alǵa tarta kelip, ıadrolyq qarýdyń áleýeti boıynsha álemdegi arsenalynan bas bartý bastamasyna aıryqsha nazar aýdardy.
B. Ertaev meımannyń ıyǵyna shapan jaýyp, shyǵaryp saldy.