ASTANA. 1 mamyr. Qazaqstan Prezıdenti Nursultan Nazarbaev Almaty qalasynda ótken 1 mamyr – Qazaqstan halqynyń birligi kúni merekelik sharasyna qatysty. Bul týraly akorda.kz-ke silteme jasaǵan egemen.kz tilshisi habarlady.
Jınalǵandarǵa arnaǵan sózinde Elbasy barshany Qazaqstan halqynyń birligi kúnimen quttyqtady.
«Bizdiń Konstıtýsııamyz «Biz, ortaq tarıhı taǵdyr biriktirgen Qazaqstan halqy, baıyrǵy qazaq jerinde memlekettilik qura otyryp...» dep bastalady. Birliktiń negizi osy sózderde túıindelgen. Biz 25 jyl boıy teń ári teńquqyly adamdardyń memleketin quryp jatyrmyz. Buǵan ásirese daǵdarys jaǵdaıynda qol jetkizý ońaı bolǵan joq», – dedi Qazaqstan Prezıdenti.
Nursultan Nazarbaev elimizdiń qalyptasýy men damýy úshin tutastyqtyń mańyzdy ekenin atap ótti.
«Birliktiń arqasynda bizdiń halqymyz orasan jer aýmaǵyn saqtap qaldy, Táýelsizdikke qol jetkizdi, naryqtyq ekonomıka qalyptastyrdy. Biz qysqa ýaqyt ishinde ózge memleketter jete almaǵan tabystarǵa jettik. Búkil álem Qazaqstandy tanydy, bizdiń pikirimizdi halyqaralyq qoǵamdastyq tyńdaıdy, elimizde kóptegen memleketterdiń qatysýymen iri sammıtter ótkiziledi, bizge senedi jáne syılaıdy, biz qaqtyǵystarda araaǵaıyndyq jasaımyz. Qazaqstan – tatýlyq pen tynyshtyq memleketi, bizden osyny úırenedi. Men sizderdiń aralaryńyzdan shyqtym jáne Prezıdent bolǵanyma qaramastan, uly halqymyzdyń qoldaýynsyz osynyń bárine qol jetkize almas edim», – dedi Memleket basshysy.
Qazaqstan Prezıdenti respýblıkamyzda ómirdiń barlyq salasynda jasalyp jatqan jaǵdaılarǵa nazar aýdardy.
Máselen, jastardyń álemdegi eń úzdik ýnıversıtetterde oqýy qamtamasyz etildi, mektepter men aýrýhanalar salyndy. Qazaqstandyqtardyń ómir jasy 64-ten 72 jasqa deıin uzardy, bul mańyzdy kórsetkishterdiń biri sanalady. Sonymen qatar, ekonomıkany damytýǵa arnalǵan rezervter aldyn ala qarastyryldy. Qazirgi ýaqytta kólik-logıstıka ınfraqurylymy qarqyndy salynyp jatyr. Memleket tarapynan shaǵyn jáne orta bızneske, aýyl sharýashylyǵyna kómek kórsetilýde.
Memleket basshysy aldymyzda jańa mindetter turǵanyn aıtty.
«Elimizde tynyshtyq saltanat quryp otyr. Bizdiń birtutas ultymyz barlyq meıramdy birge merekeleıdi. Men halqymdy dál osy qalypta kórgim keledi jáne sol úshin bar bilimim men tájirıbemdi jumsap keleminda. Biz kózdegen maqsattarymyzǵa – azamattardyń budan jaqsy ómirine mindetti túrde qol jetkizemiz. Ol úshin jastarymyz bizdiń táýelsiz jolymyzdy tabandy túrde jalǵastyryp, kózdiń qarashyǵyndaı qorǵaýy, eldegi birlikti, dostyq pen tynyshtyqty saqtaýy qajet. Bul – ár adamnyń mindeti», – dedi Qazaqstan Prezıdenti.
Sońynda Nursultan Nazarbaev barsha qazaqstandyqtarǵa densaýlyq, baq-bereke jáne ıgilik tiledi.
Talǵat Raıymbek.
Derek, foto: akorda.kz.