Soltústik Qazaqstanda etnos jastarynyń respýblıkalyq forýmy ótti

PETROPAVL. 17 mamyr. Soltústik Qazaqstan oblystyq tilderdi damytý jáne qoǵamdyq-saıası jumys komıtetiniń uıymdastyrýymen Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵy «Til – tatýlyq tiregi» atty etnos jastarynyń respýblıkalyq forýmy ótti. Bul týraly oblystyq tilderdi damytý basqarmasyna silteme jasaǵan egemen.kz tilshisi habarlady. Bıylǵy aýqymdy shara el Táýelsizdiginiń 25 jyldyǵyna arnalyp, qazaq tiliniń qoldanys aıasyn keńeıtý, mártebesi men mańyzyn keńinen nasıhattaý, memlekettik tildi meńgergen etnos jastaryna qoldaý kórsetý maqsatyn dittedi. Keń-baıtaq elimizdiń ár qıyrynan kelgen delegattardyń basyn biriktirgen alqaly jıynǵa Qazaqstan halqy Assambleıasynyń, Mádenıet jáne sport mınıstrliginiń, «Jas Otan» jastar qanatynyń ókilderi, stýdentter, memlekettik tildi meńgergen etnos jastary qatysty. Jıynda oblys ákiminiń orynbasary Anarhan Dúısenova aımaq basshysynyń quttyqtaýyn jetkizdi. Qazaqstan halqy Assambleıasynyń baspasóz hatshysy Qurmanbek Qazanbasov, aqmolalyq Ravıl Abýlhanov, astanalyq Sergeı Ageev, Qaraǵandydan kelgen Nıgara Paızıeva, Oral óńirinen Venera Sýrovseva, soltústikqazaqstandyq Svetlana Magýıanova, tilderdi damytý jáne qoǵamdyq-saıası jumys komıtetiniń basqarma basshysy Tolqyn Isaqova, taǵy basqalarynyń sózderi tili bir eldiń birligi de bekem bolmaq degen oı-pikirlermen úndesip jatty. Forým delegattary úndeý qabyldap, elimizdiń jastaryn ıgi isterdiń uıytqysy bolýǵa, tilderdiń úshtuǵyrlyǵy saıasatyn qoldaýǵa shaqyrdy. О́mir Esqalı. Derek, foto: Soltústik Qazaqstan oblystyq tilderdi damytý basqarmasynyń baspasóz qyzmeti.