Eki iri jol apatynan 27 adam qaza tapty

ASTANA. 17 mamyr. Perýde eki iri jol apatynan 27 adam qaza taýyp, 40-qa jýyǵy túrli deńgeıde jaraqat aldy. Bul týraly TASS aqparat agenttigine silteme jasaǵan egemen.kz tilshisi habarlady. Republica basylymynyń aqpary boıynsha, onyń biri memlekettiń soltústik aımaǵynda bolǵan. Jeńil kólik pen eki jolaýshylar avtobýsy soqtyǵysty. Sondaı-aq, kólikterdiń biri jol jıegindegi meıramhanalardyń birine kirip ketken. Saldarynan 11 adam opat bolyp, 30-dan astamy zardap shekti. Polısııa qyzmetkerleriniń málimdeýinshe, jyldamdyqty shamadan tys arttyrǵan avtomobıl júrgizýshisi jol apatyna kináli bolyp otyr. Osyndaı oqıǵanyń taǵy biri Perýdiń soltústigindegi Kahamarka qalasynda oryn aldy. Atalǵan basylymnyń habarlaýynsha, birneshe adam mingen júk kóligi quzǵa qulap ketken. Boljam boıynsha, júrgizýshi rýlge ıe bola almaǵan. Saldarynan 16 adam qaza taýyp, altaýy jaraqat aldy. Perý jol apaty jıi bolyp turatyn elderdiń biri. Resmı málimetter boıynsha, 2014 jyly bul memlekette 2798 adam jol-kólik oqıǵasynan opat bolǵan. Aıan Ábdýálı. Derek: TASS. Foto: 24.kz.