Fırmanyń 5 mln. 400 myń teńgesin utqyzyp, jazaǵa ushyrady

QARAǴANDY. 17 mamyr. Qaraǵandy oblysynyń turǵyny ózi jumys isteıtin fırmanyń 5 mln. 400 myń teńgesin býkmekerlik keńsede báske tigip jibergeni úshin jazaǵa tartyldy. Bul týraly Qaraǵandy oblystyq sottyń baspasóz qyzmetine silteme jasaǵan egemen.kz tilshisi habarlady. Farmasevtıkalyq ónim satýmen aınalysatyn qaraǵandylyq jaýapkershiligi shekteýli seriktestiginiń Jezqazǵan óńirindegi ókili bolyp jumys istegen 28 jastaǵy er adam dárihanalardan kúndelikti túsken aqshany býkmekerlik keńselerde báske tigip kelgen. Urlanǵan aqshanyń somasy 5 mln. 400 myń teńgege jetkende fırma basshylyǵy onyń bul áreketin áshkere etip, quqyq qorǵaý oryndaryna habarlaǵan. Osy oqıǵa boıynsha qylmystyq is qozǵalyp, is sotqa jiberildi. Jezqazǵan qalalyq soty aıyptalýshynyń urlanǵan aqshany ıesine qaıtaryp bergendigin jáne asyraýynda úsh balasy men kári anasy baryn eskerip, jeti jylǵa shartty túrde bas bostandyǵynan aıyrdy. Qaırat Ábildınov. Derek: Qaraǵandy oblystyq sottyń baspasóz qyzmeti. Foto: capital.kz.