Jazǵy Olımpıadaǵa 78 kún qaldy
Kúnnen kún asqan saıyn mejeli merzim jaqyndap keledi. Sáýirdiń 21-inde ejelgi Olımp taýynyń eteginde tutatylǵan alaý 6 kúnnen keıin Afına qalasynda Rıo-2016 oıyndaryn uıymdastyrý komıteti ókilderine tapsyryldy. Osydan keıin Jeneva arqyly Brazılııaǵa aparyldy. Mamyrdyń 3-inen beri alaý estafetasy eldiń búkil aýmaǵyn aralap júr. Osy 95 kúnniń ishinde 83 qala men 500-den astam qalashyqtardy jaǵalap ótetin otty tyǵyrshyq dál 5 tamyzda Rıo-de-Janeırodaǵy ataqty «Marakana» stadıonyna jetkiziledi.
Al bul aralyqta kezekti XXXI jazǵy Olımpııa oıyndarynyń áli taratylmaǵan joldamalaryn jeńip alý jolyndaǵy jarystar jahannyń túkpir-túkpirinde qyzý júrip jatyr. Osy kezge deıin Qazaqstan sportshylary aıtýly alamanǵa sporttyń 22 túrinen 82 lısenzııa jeńip alyp úlgerdi. Aldaǵy ýaqyttarda bulardyń sany taǵy da arta túsýi tıis.
Astanalyqtar Olımpıadaǵa qurmet kórsetti
Astanada Rıo-de-Janeıro Olımpııalyq oıyndarynyń qurmetine arnalǵan sporttyq shara ótkizildi. Oǵan Mádenıet jáne sport mınıstri Arystanbek Muhamedıuly, Ulttyq Olımpıada komıtetiniń bas hatshysy Danııar Ábilǵazın jáne qala ákimi Ádilbek Jaqsybekov bastaǵan laýazymdy tulǵalar keldi.
Tórt jylda bir aınalyp keletin sıkldyq sport jarysy qurmetine uıymdastyrylǵan aıtýly aksııany tamashalaý úshin qalanyń kóptegen turǵyndary jınaldy. Olar osy alamanda elimizdiń namysyn qorǵaıtyn sportshylarymyzǵa qýatty qoldaý kórsetý úshin keldi. Jankúıer jurt shara barysynda birqatar sańlaqtarymyzdyń ónerlerin tamashalap, túrli jarystar men sheberlik dáristerine qatysty. Sol sátteri «Han Shatyr» saýda-oıyn-saýyq ortalyǵynyń mańy naǵyz sporttyq alańǵa aınalyp ketti.
Kópshilik aldynda sóz sóılegen qala ákimi Ádilbek Jaqsybekov olımpıadashylardy tórtjyldyqtyń basty dodasy bastalatyn shaqtyń jaqyn qalýymen quttyqtaı otyryp, sportshylarǵa básireli básekelerde tabys bıiginen kórinýdi tiledi, al jınalǵandardy sportpen aınalysýǵa shaqyrdy.
«Men Qazaqstan sportshylarynyń Olımpııa oıyndarynda joǵary nátıjege qol jetkize alatynyna senemin. Olarǵa sáttilik jáne densaýlyq tileımin. Bul – álemdegi eń eleýli jáne aýqymdy sharalardyń biri. Qazirge deıin bizdiń sportshylarymyz Olımpıadanyń 82 joldamasyna qol jetkizip otyr. Elimizde Prezıdenttiń tapsyrmasymen sportshylar úshin barlyq jaǵdaı jasalǵan, sondyqtan olar jaqsy nátıje kórsetedi dep senemiz. Biz óz kezegimizde olardy qoldap, demeý kórsetetin bolamyz», – dedi qala basshysy.
Jıynda Astana sportshylarynyń aldaǵy mejeleri týraly da aıtyldy. Kúni búginge deıin olar sporttyń 8 túri boıynsha 13 lısenzııa jeńip alǵan. Al aldaǵy ýaqytta bulardyń sany áli de arta túsetin bolady.
Aqtóbe de joldama taratqaly otyr
Aqtóbedegi «Dostyq» sý sporty ortalyǵynda júzýden elimizdiń chempıonaty sóreden shyqty. Bul jarystyń ereksheligi sol, ashyq sıpatta ótetin oǵan Reseı, Belarýs jáne О́zbekstan elderiniń de sportshylary qatysyp jatyr. Olar osynda 5 kúnge sozylatyn jarys barysynda Rıo Olımpıadasynyń lısenzııasy úshin kúresýde.
Osylaısha, tamyz aıy boıy derlik Brazılııada kórik qyzdyratyn jazǵy Olımpııa oıyndaryna qatysý quqyǵyn beretin lısenzııalardy jeńip alý básekesi bastalyp ketti. Jarys cý sporty túrleri boıynsha halyqaralyq federasııasynyń (FINA) maquldaýymen ótýde. Saıysty baqylaýǵa Qazaqstan Mádenıet jáne sport mınıstrliginiń arnaıy ókilderi keldi.
– Chempıonatqa barlyǵy 17 komanda keldi. Bizden basty úmitkerler qatarynda Aleksandr Tarabın, Sabyr Almat, Aıbek jáne Álibek Qamzenovter, Ekaterına Rýdenko, Ádil Qasqabaı sekildi sańlaqtarymyz bar. Ashyq chempıonatqa qatysýshylardyń ónerlerin baǵalaýshylar sapyna halyqaralyq federasııanyń resmı tóreshisi V.Makarevıch te qosyldy, – deıdi Mádenıet jáne sport mınıstrliginiń sport jáne deneshynyqtyrý komıteti tóraǵasynyń orynbasary Serik Jarasbaev.
Munda jarystyń túrinen lısenzııalar taǵdyry sheshiledi.
Quramanyń jańa formasy daıyn
Bıylǵy naýryz aıynda Astanada Qazaqstan Ulttyq Olımpıada komıtetiniń kezekten tys sezi ótti. Onyń barysynda 2016 jylǵy Rıo jazǵy Olımpııa oıyndaryna qatysatyn sportshylarymyzdyń paradtyq jáne sporttyq formalarynyń tusaýkeseri boldy.
Bul joly jańa formada respýblıka úshin dástúrli sanalyp kelgen túrli-tústi boıaýlardan bas tartýǵa sheshim qabyldandy. «Qazjeńilónerkásip-Almaty» kıim tigý kásipornynyń dırektory Aıbek Bekturǵanovtyń aıtýynsha, paradtyq olımpııalyq kıimderdi tigýge tabıǵı jipterden toqylǵan joǵary sapaly matalar paıdalanylǵan.
«Erlerdiń paradtyq formasy quramyna pıdjak, jeıde, galstýk, týflı, jol sómkesi jáne qolshatyr kirdi. Al áıelder kıiminiń jıyntyǵy jeńil jaketten, ıýbkadan, týflıden, jol sómkesi men qol shatyrdan quraldy. Formalar ár sportshy úshin jeke tigildi», – dedi Aıbek Bekturǵanov.
«Biz formany daıyndaý kezinde barlyq tilekterdi eskerip otyrdyq. Soǵan oraı buryn dástúrli sanalyp kelgen pishimderden de bas tarttyq. Onyń qalaı shyqqanyn qazir ózderińiz kórip otyrsyzdar. Kózdi qýantady. Osyǵan oraı sańlaqtarymyz úmitti de aqtap, joǵary tabystarǵa jetip jatsa, nur ústine nur bolar edi», – dedi Olımpıada chempıony Serik Sápıev.
Kıimderdi daıyndaýǵa qatysqan kompanııanyń bas dırektory Elena Savıcheva kostıýmderdi ázirleý barysynda Brazılııadaǵy aýa raıy jaǵdaıynyń erekshelikteri de eskerilgenin aıtyp ótti.
Ulttyq olımpııalyq komıtettiń basshysy Tımýr Qulybaev jıynda kıimder úlgilerine joǵary baǵa bere kelip, elimizdiń sport qaýymdastyǵyn barlyq kúsh-jiger men ynta-yqylasty Rıo-de-Janeıroda ótetin Olımpııa oıyndarynda joǵary nátıjelerge jetýge umtylýǵa shaqyrdy. «Biz birinshi kezekte taza sporttyq jáne ádil kúres qaǵıdattaryn ustanýǵa tıispiz», – dedi ol.
Boksshy qyzdar elordada joldama úshin kúresedi
Astanada mamyrdyń 19-27-si aralyǵynda bokstan áıelder arasyndaǵy álem chempıonaty ótkeli tur. Ol 51, 60 jáne 75 kıloǵa deıingi salmaqtar dárejesi boıynsha Olımpıada joldamasynyń ıelerin anyqtaıdy. Bizden munyń aldynda ótken olımpııalyq irikteý týrnırinde 75 kıloǵa deıingi salmaqtaǵy Darıǵa Shákimova lısenzııa jeńip alyp qaıtqan bolatyn. Demek, elorda rınginde endi qalǵan eki salmaq boıynsha keskilesken kúres júredi. Soǵan qaramastan, Qazaqstan birinshilikke tolyq quramymen qatysady.
Astana qalasyndaǵy «Barys-Arena» saraıynda jalaý kóteretin saıysta álemniń 64 elinen keletin 300-ge jýyq burymdy bylǵary qolǵap sheberleri kúsh synasady.
Serik PIRNAZAR,
«Egemen Qazaqstan»
