Almatyda kúnde de, túnde de jaýyn

Bıylǵy kóktem ózgeshe... Almaty aýa raıynyń bul maý­symda mundaıy joq edi, kúnara jaýyn. Túnge qaraı shelek­tep jaýǵan nóserden turǵyndar shoshynatyndy shyǵardy. Endi she, ótken jyly taýdaǵy bir saǵattyq jaýynnan keıin oqys minez tanytqan arnasy qyldyryqtaı Qarǵaly ózeni bıyl mamyr aıynyń basynda taǵy bir ret tasyp úlgerdi. Mamyr mamyr bolǵaly Almatyda kún aralatyp kúndiz de, túnde de tópelep nóser jaýady. Almatynyń kónekózderi buryn-sońdy mundaı qubylysty baıqamaǵanyn eske alýda. Túske deıin qas-qaǵym sátte sirkirep, kún kúrkirep, naızaǵaı oınap, kúlli qalany bir shaıyp ótetin Almatynyń aq jaýyny saǵynysh bolyp qalǵandaı. Taý bókterine jaıǵasqan alyp shahardyń asfalt kóshelerinde ózen bolyp aqqan jańbyr sýy, eńis jerde kól bolyp turyp qalatyndy shyǵardy. Mundaı nóserli jańbyrǵa Almaty metrosy da boı úıretpegenin baıqatty. Tasqyndap kelgen jańbyr sýyna nysandaǵy drenajerlik júıeniń shamasy jetpeı, stansa­nyń ishine sý ketti. Ol týraly áleý­mettik jelilerde jappaı jazyldy. Kóp keshikpeı «Jibek joly» stan­sasyndaǵy bul tosyn oqıǵaǵa baılanysty «Metropolıten» kompanııasy dırektorynyń kómekshisi Ajar Habıeva jaýyn sýynyń poıyzdarǵa da, jolaýshylarǵa da esh qolaısyzdyq týǵyzbaǵany týraly, onyń tez arada «súrtilip» alynǵany týraly aıtty. Ataqty «Medeý» sport keshenine barar jolda jańbyr mol sińgen jarqabaq opyrylyp, alǵash ret laı kóshkini júrdi. Ol da tehnıka men adam kúshimen tez arada tazartyldy. Qalalyq TJD kúni-túni saq otyr. «Jyǵylǵanǵa judyryq» degendeı, jańbyr bir basylǵan sátte Qaldaıaqov pen Qazybek bı kóshesiniń qıylysynda jer astyna kómilgen sý qubyrynan ystyq sý atyp, sýburqaq tórt qabat úıdiń bıiktigindeı jerge shapshydy. Asfalt tósenishtiń aspanǵa jańqadaı ushqanyn óz kózimen kórgender bar! Júrginshiler aman, kóshede qańtarýly turǵan eki jeńil kólik qatty zardap shekti. Tıisti oryn­dar 1993 jyly salynǵan sý qubyry­nan syzat ketkeni, sýdyń ystyqtyǵy 45 gradýstan joǵary bolmaǵany týraly habarlama jasady. Qubyrdy qalpyna keltirý jumysy aıaqtalyp keledi... «Kazgıdromettiń» málimeti bo­ıynsha búgin, erteń, arǵy kúni... Almatyda taǵy da jaýyn jaýady. Talǵat SÚIINBAI, «Egemen Qazaqstan»  ALMATY