73 jyldan soń

Otan soldatynyń súıegi elge jetkizildi Kúndeı kúrkirep ótken soǵystyń ashy zardaby myńdaǵan júrekterden áli jazylǵan joq. Qan maıdanǵa Ońtústik Qazaqstan oblysyndaǵy qazirgi Báıdibek aýdany, Myńbulaq aýylynan attanǵan Maqash Tájibaev 1942 jyly habar-osharsyz ketken edi. Reseıdiń «Pamıat-2015» izdeý birlestigi maıdangerlerdiń derekterin anyqtaý barysynda bozdaqtyń súıegin tapqan. Olar medaldaǵy aty-jóninen týǵan jerin taýyp, habar bergen. Maıdan dalasynda qurban bolǵan jaýyngerdiń súıegin oblystyq ardagerler keńesi men bir top depýtat týǵan elge ákeldi. Shymkenttegi Abaı saıa­baǵynda «Máńgilik alaý» memorıalynda saltanatty jıyn ótip, jaýyngerdiń súıegi týys­qan­daryna tapsyryldy. Sóıtip, jaýyngerdiń Kalýga oblysynda jerlengen súıegi endi týǵan jerinen máńgilik damyl tapty. Osyǵan qosa aıtatyn bir derek, Ońtús­tik Qazaqstannan maıdanǵa 140 myńnan astam jaýynger attanǵan. Soǵysta 105 myń jaýynger habar-osharsyz ketip, sońynan «qara qaǵaz» kelgen. Sońǵy eki jylda úsh sarbazdyń súıegi tabylyp, týǵan jerge ákelindi. Baqtııar TAIJAN, «Egemen Qazaqstan» Ońtústik Qazaqstan oblysy