Máskeýde «Juldyzdar toǵysqanda» fılminiń tusaýkeseri boldy

ASTANA. 18 mamyr. Máskeýde Qazaqstan Prezıdentiniń ómiri jaıly túsirilgen «Juldyzdar toǵysqanda» atty kınotýyndynyń  4-bóliminiń tusaýkeseri ótti. Bul týraly 24.kz-ke silteme jasaǵan egemen.kz tilshisi habarlady. Fılmde Elbasynyń kóregen saıasatkerge aınalý joly men 80-90 jyldardaǵy el damýy kórsetilgen. Ssenarıı Nursultan Nazarbaevtyń kitaptary, onyń áriptesteri men týystarynyń estelikteri boıynsha jazylǵan. Qazaqstandyq kınony kórýge kelgen synshylar jańa týyndy jaıly jaǵymdy pikirler aıtty. Otandyq kınonyń tusaýy kesilmes buryn Máskeý kıno úıinde Qazaqstannyń Mádenıet jáne sport mınıstriligi men Reseıdiń kınematografıster odaǵy yntymaqtastyq týraly memorandýmǵa qol qoıdy. Eki eldiń mádenıet qaıratkerleri bir ortaq maqsatqa qol jetkizbek. Reseılikter Eýrazııa aımaǵynda «Oskar» kınosyılyǵynyń balamasyn taǵaıyndaýdy usynsa, qazaqstandyq tarap otandyq kınoındýstrııany halyqaralyq deńgeıge shyǵarmaq. «Bizdiń maqsatymyz – qazaq kınosyn halyqaralyq deńgeıge shyǵarý. Osy memorandýmnyń arqasynda Iаlta festıvaline, Máskeý kınofestıvaline qatysýdy josparlap otyrmyz. Bizdiń jaqsy kınolarymyz kóp», – dedi Mádenıet jáne sport mınıstri Arystanbek Muhamedıuly. «Búgingi tańda biz resmı túrde Eýrazııa aımaǵyndaǵy eldermen birqatar jobalardy júzege asyrmaqpyz. Bolashaqta Eýrazııalyq akademııa «Oskar» syılyǵynyń balamasyn uıymdastyrýdy kózdep otyr», – dedi  Reseı kınematografıster odaǵynyń tóraǵasy Nıkıta Mıhalkov. Baspasóz máslıhatynda Prezıdent rólin somdaý ońaı emestigi aıtyldy. Ásirese, artylatyn jaýapkershilik zor. Sonymen qatar, bul tek bir tulǵanyń basynan ótip jatqan oqıǵalar ǵana emes, bútindeı bir eldiń tarıhy jáne taǵdyry. «Prezıdent Nursultan Nazarbaev týraly fılmde barlyq eldiń tynys-tirshiligi men taǵdyrdyń ártúrli soqpaqtarynan qalaı ótkendigi keremet kórsetilgen. Ásirese, búkil eldiń XXI ǵasyrǵa qadamy dep aıtar edim. Nazarbaev dese qazir kópshiliktiń kóz aldyna ıadrolyq qarýdan bas tartyp, beıbit álem qalyptastyrýǵa atsalysyp júrgen tulǵa elesteıdi», –  dedi Reseı memlekettik dýmasynyń depýtaty Maksım Shıngarkın. 1986 jylǵy jeltoqsan oqıǵasy men 1991 jyly qol jetkizgen táýelsizdik Qazaqstan tarıhynda altyn áriptermen jazylary anyq. Buǵan qosa, eldiń álemde birinshi bolyp ıadrolyq qarýdan bas tartqandyǵy da bar. Atalǵan bastamalar fılmde keremet kórinis tapqan. Prezıdentti eldiń taǵdyrymen qatar álemniń tynyshtyǵyna alańdaǵany da jaqsy kórinis tabady. «Nazarbaev mundaı qurmetke ábden laıyq dep oılaımyn. Onyń óz eline de, búkil álemge de qosqan úlesi mol», – deıdi  Reseı Federasııasynyń halyq artısi, rejısser Vladımır Hotınenko. Fılm avtorlary jaqynda onyń 4-bólimi jaryqqa shyǵatynyn aıtady. Aıan Ábdýálı. Derek, foto: 24.kz.