Qazaqstan kásipqoı fýtbol lıgasyna jańa basshy keldi

ASTANA. 18 mamyr. Qazaqstan prezıdenttik kásipqoı fýtbol lıgasynyń prezıdenti bolyp Baǵlan Ergeshev taǵaıyndaldy. Bul týraly egemen.kz tilshisi habarlady. B. Ergeshev ár jyldary «Ordabasy» jáne «Oqjetpes» fýtbol klýbtarynyń sport dırektory bolyp qyzmet atqarǵan. Qazaqstannyń prezıdenttik kásipqoı fýtbol lıgasynyń burynǵy basshysy Oljas Abraev otstavkaǵa ketýin ulttyq qurama komandanyń matchtarymen baılanystyrdy. «Men ulttyq quramanyń joldastyq kezdesýlerine qarsy emespin. Biraq bári órkenıetti túrde bolý kerek. Biz klýbtardyń oıyndaryna yńǵaıly bolý úshin ulttyq quramanyń mamyr aıynda joldastyq matchtar ótkizýin qaladyq. Buǵan eshkim kelispedi. Biz sonda da bolsa, fýtbol federasııasynyń usynysyna qulaq asyp,  elimizdiń bas komandasyna  tamyz aıynyń basynda joldastyq kezdesýler ótkizýge ýaqyt berdik. Bizdi eshkim tyńdamady, bizben eshkim sanasqan joq. Sondyqtan men otstavkaǵa ketýge sheshim qabyldadym», dedi ol. Qazaqstan fýtbol federasııasynyń bas hatshysy Azamat Aıthojın da otstavkaǵa ketetinin málimdedi. Onyń ótinishi atqarýshy komıtettiń otyrysynda qaralady. Dastan Kenjalın. Derek, foto: Qazaqstannyń prezıdenttik kásipqoı fýtbol lıgasynyń vkontakne áleýmettik jelisindegi paraqshasy.