«Qajymuqan» kateri

Astana halyqaralyq kórmesine qoıylady Astanada ótetin halyqaralyq «KADEX-2016» qarý-jaraq pen áskerı tehnıka kórmesinde «Gıdroprıbor» ǴZI» AQ zaýyty «Qajymuqan» sý jańa muz jarǵysh kateriniń nobaıyn usynady. Kater 2014 jyldan bastap Ulttyq qaýipsizdik komıteti shekara qyzmetiniń tapsyrysy boıynsha salyna bastaǵan. Ol ózenderde, sý qoımalarynda jáne Kaspıı teńiziniń soltústik bóliginde muzda patrýldik qyzmet atqarý úshin arnalǵan. Katerdiń salmaǵy shamamen – 151 tonna, sýǵa batý tereńdigi – 1,8 m. Sonymen qatar, «Gıdroprıbor» ǴZI» AQ kórmege kelýshilerdiń nazaryna KamAZ-dyń bazasyn­da jyljymaly stansany usynady. Stansa 10 metrge deıingi tereńdikte áskerılerdiń sý asty operasııalaryn jasaýǵa arnalǵan. Bul kásiporyn «Qazaqstan ın­jınırıng» UK» AQ qura­myna kiredi. Instıtýt keme qu­rastyrý, mobıldi robot teh­nıka, súńgýirlik tehnıka, navı­gasııalyq jabdyq, munaı-gaz sektoryna arnalǵan tehnıkalardy jasaıdy. Kórmede qazaqstandyq basqa da kásiporyndar óz ónimderin kórsetedi. Olar eksportqa tor­pedo­­lardy, keme gıdravlıkasyn, za­manaýı jylý quraldaryn, kózdeýish­terge arnalǵan lınzalar men basqa da qural-jabdyqtardy usynady. Bıyl kórmeniń seksııalary keńeıtildi. Onda avıasııalyq tehnıkany, ushqyshsyz ushý apparattary men ǵaryshtyq tehnologııalary, qurlyq áskerleri men áskerı-teńiz kúshteriniń qarý-jaraǵy men áskerı tehnıkasy, IT-tehnologııalary, baılanys júıeleri men quraldary, áskerı sala­daǵy robot tehnıkalary qoıylady. Dastan KENJALIN, «Egemen Qazaqstan»