О́lketaný mýzeıi

óziniń 150 myńynshy eksponatyn kútýde Qaraǵandy oblystyq tarı­hı-ólketaný mýzeıi óziniń tól merekesin kenshiler astana­syndaǵy ortalyq saıabaqta atap ótti. Bul jerde qala mýzeıi dese ishek asyn jerge qoıǵan aǵaıyn kóptep jınaldy. Olar ashyq aspan astyna qoıylǵan tarıhı jádigerlerdi qyzyǵa tamashalady. Ásirese, samaýryndar jıyntyǵy jurttyń yqylasyna bólendi. Sondaı-aq, júz jylǵa jýyq tarıhy bar shoıyn útikterdiń túr-túri, eski saǵattar men alǵash shyqqan teledıdarlar da jurt nazaryn ózine aýdardy. Murajaı qyzmetkeri Merýert Orysbaevanyń aıtýynsha, ortalyq saıabaqtaǵy murajaı alańqaıyna 100-den astam jádiger qoıylǵan. Jalpy, oblystyq tarıhı-ólketaný murajaıynyń qorynda búgingi kúnde 149 985 jádiger bar. Qazirgi murajaı «Súıikti qalama syı» aksııasyn jarııa­lap, qolynda tarıhı jádigerler bar qala turǵyndaryna úndeý tastaǵan. Osyǵan oraı murajaı óziniń 150 my­ńynshy eksponatyn asyǵa kútýde. Murajaı qyzmetkerleri kásibı mereke kúni mýzeıdiń tabaldyryǵyn attaǵan jurt úshin túrli taqyrypty qaýzaǵan zııatkerlik-tanymdyq oıyndar men vıktorınalar usyndy. Budan bólek, olar qala tarıhymen jaqyn tanys bolǵysy keletin jastarǵa arnaıy avtomarafon uıymdastyrdy. Bul shara barysynda stýdentter men oqýshylar avtobýspen qalanyń tarıhı hám kórikti jerlerin aralap, ekskýrsııa jasady. Qaırat ÁBILDINOV, «Egemen Qazaqstan» QARAǴANDY