Atqarylǵan is az emes

Keshe Mádenıet jáne sport mınıstrliginde Arystanbek Muhamedıulynyń qatysýymen Qoǵamdyq keńes músheleriniń otyrysy bolyp ótti. Basqosý barysynda mádenıet pen sport salasyndaǵy jetken jetistikter saralanyp, ketken kemshilikter de nazardan tys qalmady. «Búgin osynda jınalyp otyrǵan mádenıet jáne sport salasyndaǵy qoǵamdyq keńes múshelerin, sarapshylardy, úkimettik emes uıymdar men azamattyq qoǵam ókilderin kórip otyrǵanyma qýanyshtymyn. Bıyl biz «Qoǵamdyq keńester týraly» zańǵa sáıkes jyl saıyn ótkiziletin osy esepti kezdesýge jınalyp otyrmyz. Aldymen, mınıstrliktiń ótken jyly atqarǵan jumystarynyń qorytyndylarymen tanys­tyryp ótsem. 2015 jyly biz Elba­synyń bastamasymen ınstı­týttyq reformalardyń jańa jolyna tústik. «100 naqty qadam» Ult Josparyn iske asyrý sheńberinde Mádenıet jáne sport mınıstrligi Qazaqstan eliniń biregeıligi men birligin nyǵaıtýǵa baǵyttalǵan reformalardyń bas­ty úılestirýshileriniń biri boldy. Bul baǵyt boıynsha qajetti zańnamalyq bazany qalyp­tas­tyrýdy qamtamasyz ete otyryp, aýqymdy jumystar atqar­dyq. Atap aıtqanda, mınıstrlik 2015 jyly salany jańǵyrtýǵa baǵyttalǵan 19 normatıvtik-quqyqtyq akti qabyldady. Mádenıet salasynda «Qazaqstan Respýblıkasynyń keıbir zańnamalyq aktilerine mádenıet jáne tarıhı-mádenı mura máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zańy qabyldandy. О́zgerister materıaldyq emes mádenı mura salasyndaǵy ulttyq zańnamalardy úzdik álemdik tájirıbelerge, sonyń ishinde EYDU-ǵa múshe-memleketterdiń standarttarymen sáıkestendire otyryp, jetildirýge múmkindik berdi. Mýzeıler men kitaphanalar qyzmetin retteıtin salalardyń normatıvtik-quqyq­tyq bazalaryn jetildirýge baǵyt­talǵan birqatar túzetýler engizildi. Zańnyń normalaryn iske asyrý maqsatynda 2015 jyly mádenıet jáne óner salalary boıynsha salalyq kórkemdik keńester qurylyp, tabysty qyzmet etýde. Mádenı saıasat tujyrymdamasyna engizilgen ózgerister men tolyq­tyrýlardyń sheńberinde mádenı-týrıstik klasterlerdi odan ári damytýǵa erekshe mán berildi. EKSPO-2017 kórmesin ótkizý kezine arnalǵan keshendi mádenı baǵdarlama ázirlendi. Sport salasynda biz Elbasynyń Jarlyǵymen bekitilgen, Dene shynyqtyrý men sportty damytýdyń 2025 jylǵa deıingi tujyrymdamasyn ázirledik. Jobanyń jańalyǵy óńirlik sport qaýymdastyqtaryn qoldaýdy kúsheıtý, sportty ekonomıka salasy jáne halyqty áleýmettik qamsyzdandyrýdyń mańyzdy faktory retinde damytý bolyp tabylady. Jalpy alǵanda, mınıstrliktiń ınstıtýttyq re­formalardyń sheńberinde iske asyryp jatqan barlyq jobalary elimizdi damytý úshin bar áleýetimizdi tıimdi qoldaný men básekelestikti arttyrýǵa baǵyt­talǵan», dedi Mádenıet jáne sport mınıstri Arystanbek Muha­medıuly. Keleli keńeske tóraǵalyq ja­saǵan belgili qoǵam qaıratkeri Myrzataı Joldasbekov te óz oılaryn ortaǵa saldy. Ol búgingi urpaq tárbıeleý máselesine mán berip, birqatar ózekti jaǵdaılarǵa toqtaldy. Ekrandaǵy ersi beınelerge, josyqsyz kanaldarǵa qadaǵalaý jasaý kerektigin qadap aıtty. Raýan QAIDAR, «Egemen Qazaqstan»