О́SKEMEN. 25 mamyr. Búgin oblystyń barlyq mektepterinde oqý jylynyń aıaqtalýyna arnalǵan sońǵy qońyraý merekesi ótti. Bul týraly Shyǵys Qazaqstan oblysy aqparattyq ortalyǵyna silteme jasaǵan egemen.kz tilshisi habarlady.
Saltanatty jıynda aldaǵy dástúrli emtıhandar men UBT synaǵyn tapsyratyn mektep bitirýshi túlekterge erekshe nazar aýdarylatyny belgili.
О́skemen qalasyndaǵy №43 mektepte oqý jylynyń qorytyndysy shyǵarylyp, úzdik oqýshylar marapattaldy. Sonymen qatar, merekelik konsertpen jalǵasqan jıynda oblys ákiminiń orynbasary Jaqsylyq Omar muǵalimderdiń adal eńbegine rızashylyǵyn bildirdi.
«Sizder úshin búgin erekshe kún. Alda ómirdiń jańa kezeńi bastalady. Árqaısylaryńyz qoǵamda laıyqty oryndaryńyzdy tabady degen senimdemin. UBT synaǵyn oıdaǵydaı tapsyryp, alǵa qoıǵan josparlaryńyzdy sátimen júzege asyrýlaryńyzǵa tilektespin. Kezdesken qıyndyqtar sizderdi shyńdaı tússin, armandaryńyzǵa jetýge jetelesin!» – dedi Jaqsylyq Omar.
Bıyl Shyǵys óńirinde 5727 oqýshy UBT, al 2446 oqýshy dástúrli emtıhan tapsyrady. Densaýlyǵyna baılanysty 206 bitirýshi emtıhannan bosatyldy. Al «Altyn belgige» úmitkerlerdiń sany 402 adamdy qurasa, úzdik attestatqa bitirýshiler sany – 165.
Dýman Anash.
Derek, foto: Shyǵys Qazaqstan oblysy aqparattyq ortalyǵy.
