Gaıtıde tyrysqaq indetinen 175 adam qaıtys boldy

ASTANA. 30 mamyr. Gaıtıde tyrysqaq indeti órship tur. Osy jyldyń basynan beri bul aýrýdan 175 adam qaıtys boldy. Bul týraly 24.kz-ke silteme jasaǵan egemen.kz tilshisi habarlady. Elde qaýiptiliktiń eń joǵarǵy – qyzyl deńgeıi jarııalandy. Málimetter boıynsha, indettiń órshýine 2010 jyldyń 12 qańtarynda bolǵan joıqyn jer silkinisi sebep bolyp otyr. Tabıǵat apatynan ol kezde 220 myńnan astam adam qaza tapqan. Zilzalanyń saldarynan búginge deıin myńdaǵan adam antısanıtarııalyq jaǵdaıda ómir súrip keledi. Sonymen qatar, aýyz sýdyń tapshylyǵy da keri áserin tıgizip otyr. Búgingi tańda tyrysqaq aýrýyn 16 myńnan astam adam juqtyrǵan. «Bizge kún saıyn 20-ǵa jýyq naýqas keledi. Bar-joǵy eki-úsh kúnniń ishinde jazylyp ketetinder bar. Al keıbiri tipti, aýrýhanada aptalap jatady», – dedi Býrjınon Ýılberg esimdi dáriger. Osyǵan baılanysty, tyrysqaq aýrýy órship turǵan aýdandarda zalalsyzdandyrý sharalary júrip jatyr. Qazirgi tańda turǵyndarǵa adam denesindegi sý mólsherin saqtaý úshin arnaıy dári-dármek taratylyp jatyr. Sonymen qatar, túsindirý, saqtandyrý jumystary udaıy júrgiziledi. Aıan Ábdýálı. Derek, foto: 24.kz.