Ońtústikte eki kishkentaı qyz kezdeısoq oqıǵa qurbandary boldy

ShYMKENT. 30 mamyr. Ońtústik Qazaqstan oblysynda ótken demalys kúni eki kishkentaı qyz balanyń kezdeısoq oqıǵalardyń qurbandary bolyp ketýlerimen erekshelendi. Bul týraly Otyrar.kz aqparyna súıengen egemen.kz tilshisi habarlady. «Demalys kúnderi tótenshe oqıǵasyz ótpedi. Saryaǵash aýdanyna qarasty  Aqtóbe aýylynda  2 jasar baldyrǵan kóz jumdy. Ol óz úıiniń aýlasyndaǵy ájethanaǵa túsip ketip,  tunshyǵyp qaıtys bolǵan. Tótenshelikterdiń málimdeýinshe, oryn alǵan jaǵdaıǵa ata-anasynyń muqııatsyzdyǵy sebep», - delingen habarlamada. Mundaı oqys oqıǵa demalys kúni oblystyń Báıdibek aýdanynda da tirkelgen. Atap aıtqanda, Boraldaı aýylyndaǵy Muryntas demalys aımaǵynda 3 jasar qyz bala sýǵa aǵyp ketken. Tótenshe jaǵdaılar qyzmetkerleriniń aıtýlarynsha, bir kúnniń ishinde bolǵan bul eki jaǵdaıda da ata-analar kishkentaı sábılerin qaraýsyz qaldyryp qoıǵan. Baqtııar Taıjan. Derek, foto: Otyrar.kz.