Bala quqyǵy basty nazarda

Keshe Prezıdent janyndaǵy Ortalyq kommýnıkasııalar qyzmetinde Bilim jáne ǵylym mınıstrligi Balalardyń quqyqtaryn qorǵaý komıtetiniń tóraıymy Z.Orazalıevanyń, Ishki ister mınıstrligi Ákimshilik polısııa komıtetiniń ıývenaldyq polısııa bólimshesiniń bastyǵy A.Ospanovtyń, Ishki ister mınıstrligi Tótenshe jaǵdaılar komıtetiniń resmı ókili R.Imanqulovtyń, Densaýlyq saqtaý jáne áleýmettik damý mınıstrligi Medısınalyq kómekti uıymdastyrý departamenti dırektorynyń orynbasary E.Ahmetovanyń qatysýymen brıfıng bolyp ótti. Halyqaralyq balalardy qorǵaý kúninde atqarylatyn sharalar, olardyń jazǵy demalysynyń joǵary deńgeıde ótýin uıymdastyrý, demalys barysynda qaýipsizdik sharalaryn qatań qadaǵalaý – jıynnyń negizgi taqyryby boldy. Al 2016 jyldyń 15 mamyry men 15 maýsym aralyǵynda elimizde Balalardyń quqyǵyn qorǵaý kúnine arnalǵan «Nurly bolashaq» respýblıkalyq aksııasy ótedi. Onyń negizgi maqsaty – eldiń balǵyn turǵyndarynyń turmys sapasyn kóterý, árbir balaǵa qurmetpen jáne qamqorlyqpen qaraýdy qadaǵalaý, olardyń quqyqtary men múddelerin aıaq asty etpeı, ákimshilik tarapynan ádil júzege asyrýdy nasıhattaý. «Atalǵan sharanyń qatysýshylar quramyn 3 mıllıonǵa jýyq bala quraıdy. Mektepke deıingi jáne mektep jasyndaǵy balalar, oqýshylar men stýdent jastar. «Bar jaqsylyq – balalarǵa» urany barlyq merekelik is-sharalardy ótkizý kezinde ustanatyn negizgi qaǵıdat bolyp tabylady. Respýblıkalyq aksııa ultyna, jynysyna, dinı senimine, áleýmettik mártebesine jáne turatyn jerine qaramastan, árbir balaǵa erekshe qamqorlyqtyń qajet ekenine qoǵamnyń nazaryn aýdarýdy maqsat tutady. Sonymen birge, ómirde qıyn jaǵdaıǵa tap bolǵan balalarǵa, jetim jáne ata-anasynyń qamqorlyǵynsyz qalǵan balalarǵa, múmkindigi shekteýli balalarǵa kóńil bólýdi kózdeıdi», – dedi Balalardyń quqyqtaryn qorǵaý komıtetiniń tóraıymy Z.Orazalıeva. Aksııa respýblıkanyń barlyq óńirinde 9 taqyryptyq bólim boıynsha merekelik sharalardy júzege asyrady. Tutastaı alǵanda, bul sharalar arqyly «bala», «baqytty balalyq shaq», «ár bala otbasynda ómir súrýi tıis», «balalardyń quqyqtaryn qorǵaý» sııaqty qundylyqtardy qoǵamnyń sanasyna ornyqtyrýǵa kúsh salý, búgingi búldirshin erteńgi eldiń otansúıgish azamaty bolyp ósýine óz úlesimizdi qosý, deıdi uıymdastyrýshylar. Raýan QAIDAR, «Egemen Qazaqstan»