Reseı tarapy bastamashylyq tanytqan sapar

Astanaǵa reseılik sot organdarynyń delegasııasy jumys saparymen keldi. Delegasııa quramyna Reseı Federasııasy Joǵarǵy Sotynyń janyndaǵy Sot departamenti Bas dırektorynyń orynbasary Vıktor Ageev, Kostroma oblystyq jáne Soltústik Kavkaz okrýgtik áskerı sottarynyń tóraǵalary, Sot departamenti basqarmalarynyń bastyqtary, sondaı-aq, «Pravosýdıe» memlekettik taldamalyq júıesin qoldaýdyń aqparattyq-saraptamalyq ortalyǵy» federaldyq memlekettik bıýdjettik mekemesiniń basshysy Leonıd Iýhnevıch engen. Sapar reseılik taraptyń bastamasy boıynsha ótýde. Maqsaty – elektrondy sot tóreligin engizý men sottar jumysyn uıymdastyrýdaǵy qazaqstandyq tájirıbeni zerdeleý. Sapardyń alǵashqy kúni Joǵarǵy Sot Tóraǵasy Qaırat Mámımen, Joǵarǵy Sottyń mamandandyrylǵan alqasynyń tóraıymy Aıgúl Qydyrbaevamen, Joǵarǵy Sot janyndaǵy Sottardyń qyzmetin qamtamasyz etý departamentiniń basshysy Ilııas Ispanovpen, departamenttiń qurylymdyq bólimsheleriniń ókilderimen birqatar kezdesýler ótti. Reseılik delegasııa Qazaqstannyń sot qurylysy men sot isin júrgizý barysynan, sondaı-aq, Ult Josparyn iske asyrý sheńberinde sot júıesinde oryn alyp jatqan ózgeristerden habardar. Sheteldik qonaqtar úshin Qazaqstan Joǵarǵy Sotynyń aqparattyq servısteri («Tórelik» AATJ, «E-qyzmet», ishki portal, «Sot kabıneti») men Joǵarǵy Sottyń sottarmen jáne IIM Qylmystyq atqarý júıesi komıtetiniń mekemelerimen beınebaılanys júıesiniń tanystyrylymy ótti. Sapar aıasynda aqparattyq servısterdiń jumysymen tikeleı tanysý maqsatynda Astana qalalyq sotyna barý kózdelip otyr. Osy oraıda meımandardy «Sot qujattarymen tanysý», «Sot isterin qaraý kestesi», «Sotqa shaqyrý», «Memlekettik baj salyǵyn tóleý», «Talap aryzdy tirkeý», «Talon berý», «SMS-habarlama alý», «Isterdi avtomatty bólý» sekildi servısterdiń jumysymen tanystyrý josparlanyp otyr. Qonaqtarǵa aýdıobeınetirkeý júıesiniń múmkindikteri, «Sot kabıneti» servısiniń talap aryzdar men ótinishterdi berý, hattardy jiberý fýnksıonaldarynyń jumysy kórsetiletin bolady. Sapar barysynda Qazaqstan Bas prokýratýrasy Quqyqtyq statıstıka jáne arnaıy esepke alý komıtetiniń tóraıymy Sáýle Aıtpaevamen, Joǵary Sot Keńesiniń tóraǵasy Anatolıı Smolınmen kezdesý ótedi. Buǵan qosa, Joǵarǵy Sot sýdıasy Elena Maksıýtamen jáne Áskerı sot tóraǵasy Sáken Abdýlaevpen kezdesýler josparlanǵan, dep habarlady Joǵarǵy Sottyń baspasóz qyzmeti.