Raqym aıy – berekeli aı

* 2016 jyldyń 6 maýsymy – qasıetti Ramazan aıynyń birinshi kúni Asa qamqor, erekshe Meıi­rimdi Allanyń atymen bastaımyn! Qurmetti musylman baýyrlar, otandastar! Barshamyzdy qasıetti Ramazan aıyna aman-esen jetkizgen Alla Taǵalaǵa sansyz shúkirler bolsyn. Sizderdi múbárak Ramazan aıynyń kelýimen quttyqtaımyn! Ramazan – on eki aıdyń sul­tany, berekeli de keshirimi mol aı. Kúndelikti tirshilik qamymen jú­retin pendeniń júregine bul aıda ıman nury quıylady. О́ıtkeni, oraza adamdy taqýalyqqa tár­bıeleıdi. Sabyrlylyq, qaıy­rymdylyq, meıirimdilik, baýyr­maldyq sekildi adamdyq asyl qasıetter artyp, ıman kúsheıedi. Ramazan – Allanyń meıirimi tógilip, jumaqtyń esigi aıqara ashylatyn, ımandy kúsheıtýge múmkindik berilgen berekeli aı. Bul – Jaratýshy Iemizdiń uly syıy ári nyǵmeti. Saýaptar eselenip jazylatyn aıda jasalǵan qaıyrly istiń qaıtarymy adam balasy úshin qupııa-syr. Tipti, aýyz bekitýshige beriletin syı men saýap, qurmet pen marapat paıǵambarlar men perishtelerge de belgisiz. Qudsı hadıste Alla Taǵala: «Ora­za – tek Men úshin. Onyń syı­yn (saýabyn) О́zim ǵana bere­min...», – dep orazanyń qadiri men qa­sıe­tin, máni men mańyzyn baıan­daǵan. Sharapaty men shapaǵaty mol aıda kúnáli isterden bas tartyp, saýap jınaýǵa, ishki dúnıemizdi tazartýǵa, Jaratýshynyń razy­lyǵyna bólenýge asyǵaıyq! Ramazannyń qadirin jaqsy túsingen sahabalar orazaǵa alty aı qalǵan sátten bastap: «Rab­bymyz, bizdi Ramazan aıyna aman-esen jetkize gór!», – dep duǵa etken. Pendeniń osy aıda ustaǵan orazasy, qosymsha qulshy­lyqtary, ózgelerge jasaǵan qaıyrymdylyǵy, barlyq saýapty amaldary eselenip jazylady. Oraza – kúndiz tek iship-jeýden ózin shekteý degen sóz emes. Oraza – rýhtyń azyǵy, tánniń shıpasy. Ramazan jan men tándi rýhanı tazartatyn, musylman úshin úlken sabyr mektebi. Aýzy berik jandar ádep bilmes pendelerdiń ózine jasaǵan keıbir oǵash is-áreketterin kórip, turpaıy sózderin estise de: «Men orazamyn», – degen bir aýyz sózben nápsisine toqtaý salyp, sabyr saqtaıdy. Al sabyr ıesine beriletin syı – jánnat. Densaýlyǵyna baılanysty nemese kárilik jetip oraza ustaýǵa shamasy jetpegen adamdar aýyz bekitken kisilerge aýyzashar berse, ol da – úlken saýap. Paıǵambarymyz Muhammed (Allanyń oǵan salaýaty men sálemi bolsyn): «Alla Taǵala eń bolmasa bir túıir qurma, tipti, bir urttam sýmen bolsa da qamqorlyq jasaǵanǵa saýap jazady…», – degen. Bıyl maýsym-shilde aılaryna tuspa-tus kelgen Ramazanda aýyz bekitýge kúnniń ystyǵy kedergi keltirmeıdi dep senemiz. Sebebi, orazany rýhanı turǵydan sezingen jan Allanyń teńdessiz syıynan shet qalǵysy kelmeıtini haq. Raqym aıy – Ramazan qut­ty bolsyn! Qasıetti aıda usta­ǵan orazamyz, jasaǵan duǵa-ti­lek­­terimiz, qulshylyq-ǵıba­dat­tarymyz, árbir qaıyrly amal­dary­myz qabyl bolǵaı! Alla Ta­ǵa­la otbasymyzǵa amandyq, ju­my­sy­myzǵa bereke-birlik násip etkeı! Táýelsizdigimiz baıandy, elimiz aman, jurtymyz tynysh bolǵaı! Áýmın! Erjan qajy MALǴAJYULY, Qazaqstan musylmandary dinı basqarmasynyń tóraǵasy, Bas múftı