Qamkóńil balalardyń qııaly aspanda qalyqtaǵan kún

1 maýsym – Halyqaralyq balalardy qorǵaý kúnine oraı ótkizilgen qaıyrymdylyq aksııasy aıasynda Astana SOS Balalar aýylynyń tárbıelenýshileri óz qoldarymen batpyraýyq jasaýdy úırenip, ózderi jasaǵan ondaǵan batpyraýyqty ushyryp kórdi. Eýrazııalyq Top (ERG) uıymdastyrǵan ushý apparattaryn jasaýdy úıretetin sheberlik sabaǵy el Táýelsizdiginiń 25 jyldyǵyna arnalyp otyr. Balalardyń mereıli merekesinde áýezdi án men kúmbirlegen kúı shalqydy. О́ıtkeni, balalar aýylynyń tárbıelenýshilerine erekshe qýanysh syılaıtyn eski dostary keldi. Balǵyndar osy dostarymen qanattasa, qatar júrip aýyl aýmaǵynda sport alańyn salyp, jemis-jıdekter alleıasyn da birlese otyrǵyzǵan bolatyn. Erte kóktemde egilgen sol máýeli aǵashtar búginde gúldep, kóp ótpeı jemis túıip, alǵash ret ónim bermek. Sharany SOS Balalar aýylynyń dırektory Záýresh Arystanova ashyp berdi. «Bizdiń burynnan kele jatqan dostarymyz – Eýrazııalyq Top ózderi búgingi aksııany ótkizý týraly bastama kóterip, ony júzege asyryp otyr. Olar bizben uzaq merzimdi áriptestik ornatýmen shektelmeı, árbir mereke saıyn qasymyzdan tabylady. Balalardyń jazǵy demalysyn uıymdastyrýǵa járdemdesýden bólek, kompanııa eń senimdi arqasúıer dos retinde bizdiń týyndaǵan kez kelgen túıtkilderimizdi sheshýge barynsha kúsh salyp keledi», – dedi ol. Balalar aýyly bıyl basty merekeni jyldaǵydan erekshe sıpatta atap ótýdi uıǵarypty. Buǵan deıin túrli fleshmobtar birneshe ret uıymdastyrylǵanymen, bul jolǵy sharanyń máni bólek. Kishkentaı búldirshinder anımatorlarmen kóńil kóterip júrgen shaqta, eresek balalar arnaıy uıymdastyrylǵan sheberlik sabaǵyna qatysyp, batpyraýyq jasaýdy úırendi. Sóıtip, sharaǵa qatysýshylardyń qyzý qoldaýymen balalar qolynan shyqqan ondaǵan batpyraýyq pen áýe sharlary kókke kóterilip, aspanda qalyqtady. Sharaǵa qatysýshylardyń aıtýynsha, aspanda qalyqtaǵan batpyraýyqtar týǵan eldiń qarqyndy damyp, qanat jaıýynyń belgisindeı bolyp kórinipti. Qosymsha tosyn syı retinde Eýrazııalyq Top atynan balalar úıine 5 mln. teńgelik chek tabys etildi. Eýrazııalyq Toptyń apparat jetekshisi Seıitqalı Rahymov tabys etken syılyq SOS Balalar aýyly tárbıelenýshileriniń jazǵy demalysyn uıymdastyryp, qoǵamdyq sharalarǵa belsene qatysýyna jáne sporttyq jabdyqtar satyp alýǵa jumsalmaq. Qaıyrymdylyq – asyl qasıet, izgiliktiń kórinisi. Ol kómekke muqtaj jandarǵa súıispenshilikpen beriletin kómek. Sondaı-aq, kisiniń aınalasyndaǵy adamdarǵa degen yqylasy men adamgershilik qarym-qatynasy. Qabaǵyna qarap halin, júzine qarap janyn túsinetin halyq emespiz be, mundaı sharapaty mol saýapty isti, baqyttan bastary aınalǵan bala júregi de sezgendeı áser qaldyrdy. Kim biledi, bálkim balǵyn búldirshinder osyndaı merekeniń kúnde ótýin ishteı armandap ta otyrǵan bolar. Bul sát ondaǵy balalar úshin shat-shadyman baqytqa kenelgen kúnderdiń biri bolyp máńgi esterinde qalmaq. – Balalardyń basym bóligi asyǵa kútken jazǵy demalys bastaldy. Endi sabaqqa daıyndalý qamyna alańdamaı erkin demalýǵa bolady. Men senderdiń aldaǵy ýaqytty kóńildi ótkizip, jaqsylap demalyp, kúsh-qýat jınap qaıtýlaryńa tilektespin. Bizdiń dástúrli syılyǵymyz osyǵan sep bolady dep senemin. Bizdi senderdiń jazǵy demalystaryńnyń jaqsy, kóńildi ári paıdaly ótýine qolǵabys ete alǵanymyz qýantady. Demalys aıaqtalyp, sabaq bastalǵan kezde «Jazdy qalaı ótkizdim» atty taqyrypqa shyǵarma jazýdan tosylmaısyńdar degen úmittemiz», – dedi S. Rahymov. ERG men SOS Balalar aýyly erteden erekshe yqylasty ári senimdi dostar. Toptyń «ERG Kómek» korporatıvtik qory osy balalar aýylynyń tárbıelenýshilerin 2007 jyldan beri turaqty qoldap keledi. Búginde qarjylandyrýdyń jalpy somasy 34 mln. teńgege jetti. Bul qarajat mekemeniń Astanadaǵy aýmaǵyna sport alańyn salýǵa, balalardyń jazǵy demalysyn uıymdastyrýǵa, Qazaqstandaǵy SOS Balalar aýylynyń tárbıelenýshilerine VII qysqy Azııa oıyndary ashylý saltanatynyń bıletterin satyp alýǵa, balalar sýretteriniń baıqaýlary men ózge de kóptegen is-sharalardy uıymdastyrýǵa jumsaldy. Eýrazııalyq Top tek SOS Balalar aýylyna kómek kórsetýmen ǵana shektelip qalmaı, kompanııanyń óndiristik kásiporyndary ornalasqan óńirler – Aqtóbe, Qaraǵandy, Qostanaı jáne Pavlodar oblystaryndaǵy balalar úılerine turaqty qamqorlyq kórsetip keledi. Sońǵy jyldary ERG demeýshilik pen qaıyrymdylyq sharalaryna 70 mlrd. teńgege jýyq qarajat baǵyttaǵan. Raýshan TÁÝIRHANQYZY, «Egemen Qazaqstan»