ALMATY. 2 maýsym. Momyshuly men Aqyn Sara kósheleriniń qıylysyndaǵy №136 turǵyn úıdiń («Alǵabas-6» yqsham aýdany) turǵyndary tún ishinde qaǵylǵan dabylmen syrtqa shyǵaryldy. Sebebi, 9 qabatty turǵyn úıdiń bir jaǵyna shógip, aýa bastaǵany baıqalǵan. Bul týraly Almaty qalalyq tótenshe jaǵdaılar departamentiniń baspasóz qyzmetine silteme jasaǵan egemen.kz tilshisi habarlady.
Tótenshe oqıǵa bolǵan jerde qazir qalalyq jáne Alataý aýdandyq ákiminiń quzyrly ókilderi men qutqarýshylar, quqyq qorǵaý organdarynyń qyzmetkerleri, órt sóndirýshiler men jedel járdem qyzmetiniń mamandary júr. Aýmaq qorshalǵan. Bóten adam kirigizilmeıdi. Tuǵyndar úıdiń qısaıýy bir aı toqtaýsyz jaýǵan jańbyrdyń saldarynan bolýy múmkin degen boljam aıtýda.
Ishki ister mınıstrligi tótenshe jaǵdaılar komıtetiniń resmı ókili Rýslan Imanqulovtyń málimdeýinshe, tez arada syrtqa shyǵarylǵan 200-ge jýyq adam shatyrly qalashyqtar men qonaq úılerge jaılastyryldy. Qurylysshy mamandardan qurylǵan komıssııa iske kiristi. Turǵyn úıdiń jaramdy-jaramsyzdyǵy týraly aqtyq sheshimdi solar aıtady.
Talǵat Súıinbaı.
Derek, foto: Almaty qalalyq tótenshe jaǵdaılar departamentiniń baspasóz qyzmeti.
