Matematıkter fýtbol nátıjelerin boljaıtyn qurylǵy oılap tapty

ASTANA. 2 maýsym. Avstrııadaǵy Insbrýk ýnıversıtetiniń zertteýshileri fýtboldan 2016 jylǵy Eýropa chempıonaty nátıjelerin boljaýǵa múmkindik beretin statıstıkalyq model oılap shyǵardy. Bul týraly RIA «Novostı» aqparat agenttigine silteme jasaǵan egemen.kz tilshisi habarlady. Saraptaý nátıjeleri dúbirli dodada Fransııa men Germanııa qurama komandalarynyń jeńiske jetý múmkindikteri joǵary ekenin kórsetti. Ǵalymdar ózderiniń boljamyn jasarda 19 býkmekerdiń málimetterine súıengen. Olardy naqtylyǵy ázirge aıtylmaıtyn kúrdeli statıstıkalyq modelderge qoldandy. Osyǵan deıingi statıstıkalyq modelderdiń senimdiligi sońǵy eki Eýropa chempıonaty men álem chempıonatynda dáleldendi. Alaıda, ǵalymdar olardyń daıyndaǵan qurylǵylarynyń match qorytyndysyn 100 paıyzdyq naqtylyqpen boljaı alýy ekitalaı ekenin aıtty. Aıta keteıik, bıyl Eýropa chempıonaty 10 maýsym men 10 shilde aralyǵynda Fransııada ótedi. Aıan Ábdýálı. Derek, foto: RIA «Novostı».