Astanadaǵy aqyly turaqtar

úshin qala ákimidigi 250 telim bólmekshi  Astana qalasynda kommýnal­dyq aqyly kólik turaqtaryn ashý máselesi qaraldy. Osyǵan baılanysty tıisti taldaý jumystary júrgizildi. Sonyń nátıjesinde aqy tólep, kólik qoıýǵa bolatyn 259 ýchas­ke anyqtaldy. Olar­dyń shekarasy eki jolmen – jol belgilerimen jáne belgileý arqyly belgilenedi. Astana qalasy jolaýshylar kóligi basqarmasynyń basshysy Edil Súleımenovtiń aıtýynsha, tehnıkalyq málimetter boıynsha 40 turaq ornyna 1 parkomattan keledi. –Jobaǵa kiretin jabdyqtarǵa parkomattar, mobıldi qosymsha, aqparattandyrý júıesi, tetikter men tólem jasaýdy baqylaý júıesi jatady. Astana LRT kompanııasymen birge ınvestormen kelisim jasalady. Bul jaǵdaıda bıýdjet qarjysy emes, tek ınvestısııalyq qarjy ǵana jumsalady, – dedi ol. Atalǵan joba eki kezeńge bó­linedi. Birinshi kezeńde qalanyń sol jaǵalaýynda – «Nurjol» jeleginiń, Aqmeshit pen Túrkistan kósheleriniń boıynda 910 aqyly turaq orny paıdalanýǵa beriledi. Biraq, bul kezeńde Qoǵamdyq keńes músheleri men Astana qalasynyń máslıhaty depýtattarynyń eskertýlerin eskere otyryp, atalǵan ýchaskelerdegi turaqtar testilik rejimde jumys isteıdi. Al júıe tehnıkalyq jaǵy­nan tolyǵymen synaqtan ótip bolǵan soń aqyly bolady. Qazirgi kezde kommýnaldyq aqy­ly turaqtardy paıdalaný úshin tarıfti esepteý júrgizildi. Belgilengen baǵa barlyq shyǵyn­dardy tolyq óteýge kepildik berip, rentabeldilikti qamtamasyz etedi. Esepteýler boıynsha, bir saǵat úshin tarıf 182 teńge bolady. Biraq jobanyń áleýmettik mańyzdylyǵyn eskere kelip, bazalyq tarıfti saǵa­tyna 150 teńge mólsherinde belgileý usynyldy. «Atalǵan jobanyń maq­­saty aqy alý, bıýdjetti tolyq­tyrý emes, kóshe-jol jelisine tú­setin júk­temeni azaıtý»,  – dedi E.Súleımenov. Astana qalasy qoǵamdyq keńe­siniń músheleri jobany eshbir eskertýsiz qabyldady. Dastan KENJALIN, «Egemen Qazaqstan»