Fransııa taǵy da áýpirimmen jeńdi

* Doda Fransýz jerinde ótip jatqan fýtboldan Eýropa chempıonatynyń burnaǵy kúni bastalǵan ekinshi týrynda alań ıeleri Albanııa quramasyn 2:0 esebimen jeńse, Slovakııa Reseıdi 2:1 etip tize búktirdi, al Rýmynııa men Shveısarııa arasyndaǵy kezdesý 1:1 bolyp teń tarqady. Osylaısha Fransııa eki oıynda birde-bir upaı joǵaltpaǵan týrnırdegi eń alǵashqy qurama ataǵyna qol jetkizdi. Biraq aldyńǵy ushyrasýdaǵy sııaqty bul oıynda da olarǵa jeńiske jetý ońaıǵa soǵa qoımady. Ádette kez kelgen oıynnyń qalaı ótkeni umyt bolady da, keıin onyń esebi ǵana este qalady. Biz sóz et­keli otyrǵan úsh matchtyń ekeýin­degi ahýal osy tujyrymdy aıǵaqtaı túsedi. Qurlyq birinshiliginde favorıtter qatarynan oryn almaǵanymen, Reseı bas jasaǵynyń Slovakııadan utylyp qalýy mamandar tarapynan kútpegen jaǵdaı sanaldy. Shynynda da reseılikterdiń osy kúni qarsylastaryna ese jiberip alatyndaı retteri joq edi. Olar birinshi týrda aǵylshyndarmen teń oınaǵannan keıin kezdesýge kóterińki kóńil kúımen keldi. Slovaktar bolsa, alǵashqy match­ta Ýelsten 1:2 esebimen jeńilip qalǵan. Bizdiń kórshilerimiz op­tımıstik saryndaǵy arman-oılaryn oıynnyń alǵashqy jarty saǵatynda anyq baıqatty. Osy bólikte olar qarsylastar qaqpasyna qaraı Anglııamen teketirestiń búkil ón boıyndaǵydan da artyq soqqy jasap úlgerdi. Soǵan qaramastan, Matýsh Kozachıktiń dop jolyna domalaı qulaǵan sáti onshalyqty kóp bolǵan joq. Aldyn ala aıta keteıik, sońynan matchtyń úzdik oıynshysy ataǵy tap osy qaqpashyǵa berildi. Bir qyzyǵy, slovaktar bul joly vallııliktermen ótken birinshi súrgin kezindegiden de nashar oınady. Biraq munyń ózi olardyń birinshi taımda eki gol salyp, týrnırde osyndaı jetistikke jetken alǵashqy komanda atanýyna eshbir kedergi keltire almady. Gol da kútpegen jerden soǵyldy. Reseılikter sha­býylynyń nópirinde qalǵan slovaktar jartylaı qorǵaýshysy Marek Gamshık alań ortasynda aıaǵyna dop tıisimen ony aldyndaǵy Vladımır Vaıssqa asyryp tastady. Sol-aq eken, quıyndaı ushqan shabýylshy demde qarsy qaqpa aldyna jetip baryp, snarıadty oń jaq buryshqa solqyldata atyp jiberdi. Gol! Al taım túgesiler shamada Gamshıktiń ózi buryshtamadan kelgen dopty aıyp alańynyń syrt jaǵynda qabyldap alyp, qaqpaǵa alystan uryp túsirdi. Reseılikter tek ekinshi taımnyń sońyna qaraı Denıs Glýshakovtyń kúsh salýymen bir doptyń qarymtasyn qaıtaryp úlgerdi. Olar buǵan deıin de, budan keıin de tynymsyz jasaǵan shabýyldarynyń birde-birinen nátıje shyǵara almaǵan. Birinshi týrda baryn salyp oınaǵan Albanııa alań ıelerimen kezdesýde de aıanyp qalǵan joq. Olar Dıde Desham shákirtterin attap aıaq bastyrmady. Fransýzdar ekinshi taımda Pol Pogba men Antýan Grızmann shyqqasyn ǵana erkindeý oınady. Biraq 90-mınýtqa deıin qarsylastar qaqpasyna bir ret te týra soqqy jasaı almady. Ras, dop bir márte qaqpa jaqtaýynan qaıt­qan. Biraq mundaı «tabys» albandardy aınalyp ótpep edi. Bárin Grızmannyń gol soǵýy buzyp jiberdi. Al ekinshi goldy fransýzdar (Dımıtrı Paıe) tóreshiniń negizgi ýaqytqa qosqan 6-mınýtynda (!) ǵana saldy. Sóıtip, sońǵy sátke deıin teń turǵan oıyn aıaq astynan eki dop aıyrymymen alań ıeleriniń paıdasyna sheshilip shyǵa keldi. Bularǵa qaraǵanda, Rýmynııa men Shveısarııa arasyndaǵy match jalpy kórermen qaýymnyń aıryqsha qyzyǵýyn týǵyzǵan joq. Buǵan stadıonnyń birinshi ret tolmaı qalǵany da aıǵaq. Soǵan qaramastan, munda da keskilesken shaıqas júrip jatty. Onda taǵy da rýmyndar jal­ǵyz goldaryn penaltıden saldy. Al shveısarııalyqtar tarazy basyn teńestirý úshin kóp kúsh jumsady. Keshe túnde Anglııa – Ýels, Ýkraına – Soltústik Irlandııa jáne Germanııa – Polsha kezdesti. Serik PIRNAZAR, «Egemen Qazaqstan»