Jalań uran, qurǵaq ýáde senimge selkeý túsiredi

Parlament Májilisindegi «Nur Otan» partııasy fraksııasynyń múshesi Janat Jarasovtyń tóraǵalyq etýimen partııa janyndaǵy Sybaılas jemqorlyqqa qarsy is-qımyl jónindegi respýblıkalyq qoǵamdyq keńestiń kezekti otyrysy ótip, onda Qostanaı oblysynda atqarylǵan jumystardyń jaı-japsary talqylandy. Jıynǵa Keńes músheleri men Májilis depýtattary, partııanyń Ortalyq apparatynyń jaýapty qyzmetkerleri jáne múddeli memlekettik organdardyń ókilderi qatysty. Aldymen 2015-2025 jyldarǵa arnalǵan Sybaılas jemqorlyqqa qarsy is-qımyl baǵdarlamasynyń Qostanaı óńirinde júzege asyrylý barysy jóninde oblys basshysy, «Nur Otan» partııasynyń osy oblystaǵy fılıal tóraǵasy Arhımed Muhambetov arnaıy baıandama jasady. Sondaı-aq, jıynda sóz alǵan Saraptama komıs­sııasynyń jetekshisi, Keńes tóraǵasynyń birinshi orynbasary Oralbaı Ábdikárimov sońǵy kezderi qoǵam ishinde jalań uran, qurǵaq ýáde kóbeıip ketkendigine qatty qynjylysyn bildirdi. Negizinen, kún tártibinde úsh másele talqylanǵan bolatyn. Al aımaq basshysy óz baıandamasynda jergilikti atqarýshy organdar ákimdik qyzmetkerleri el ıgi­ligi úshin belsendi áreketter jasap jatqandyǵyn atap ótti. «Onyń bir parasyna toqtalyp óter bolsam, osy kezge deıin iske asyrylǵan sharýalarymyz edáýir. Jalpy, jumys­tyń qorytyndysy retinde mynadaı derekter keltire alamyn. Máselen, kúni búginge deıin oblys aýmaǵynda sybaılas jemqorlyqqa qarsy úgit-nasıhat pen túsindirý jumystary retinde 403 shara uıymdastyrylǵan bolsa, osy baǵyttaǵy jumystardy jandandyrý maqsatynda memlekettik mekemeler men úkimettik emes uıymdar, jastar ortalyqtary, qoǵamdyq keńester arasynda ózara yntymaqtastyqty tereńdetetin 11 áriptestik memorandýmy bekitildi. Sonymen qatar, «Nurly Jol» memlekettik baǵdarlamasy aıasynda júzege asyrylyp jatqan nysandardaǵy jumys úderisterin qadaǵalaý úshin qostanaılyq nurotandyqtar bastamasymen BAQ ókilderin qatystyra otyryp 6 ret reıdtik baqylaý sharasy uıymdastyryldy. Al «О́zińnen basta» aksııasyna oraı, 411 adam (onyń ishinde laýazymdy memlekettik qyzmetker men aýdan ákimderi syndy sheneýnikter jáne olardyń orynbasarlary da bar) óz attaryna tirkelgen múlikteri men tabys kólemderin ashyq jarııalaýǵa belsendi qatysty», dedi Arhımed Bekejanuly. Osylaısha, aldymen óńir­degi tynys-tirshiliktiń ońtaıly tustaryn tizbelegen ákim, sóz sońyna qaraı, keıbir olqy túsip jatqan kemshilikterge de toq­taldy. Onyń aıtýynsha, qazirgi kezde óńirdegi memlekettik satyp alý qyzmetiniń problemalary barshylyq. Ákim osy jerde «Tobyl» áleýmettik-kásipkerlik korporasııasyndaǵy túıtkildi máseleler men oblystaǵy prob­lemaly qurylys nysandary jáne joldardyń sapasyz jóndelýine qatysty qoǵam tarapynan aıtyl­ǵan syndardyń sheshimin tabý jaıy shuǵyl qolǵa alynǵandyǵyn tilge tıek etti. Aıta keteıik, alqaly jıyn ótetin kún belgilengenge deıin «Nur Otan» partııasy janyndaǵy Sybaılas jemqorlyqqa qarsy is-qımyl jónindegi respýblıkalyq qoǵamdyq keńes músheleri Qostanaı óńirin aralap, jurtshylyqpen júzdesip, qoǵamdyq qabyldaý ótkizgen bolatyn. Qyzmettik sapar aıasynda jumys tobynyń músheleri aımaqtaǵy ıgi ister men sheshimin tabýy tıis túıinderdiń jolyn talqylap, óreskel qatelikter men birqatar zańsyzdyqtardy taspaǵa túsirip, búgingi jıyn qatysýshylarynyń aldynda qaıta talqylaýdy jón sanapty. Onda Qostanaı qalasynyń irgesindegi «Aeroport» shaǵyn aýdanyndaǵy turǵyn úılerdi gazdandyrý jáne jylytý júıesimen qamtý, Qarasý aýylyndaǵy Esil sý qubyryn júrgizý jaıy, qala ishindegi jol­darǵa jóndeý júrgizý, taǵy bir shaǵyn aýdandaǵy kópqabatty tur­ǵyn úılerge kirgizilgen jylý quby­rynyń bekitilgen jospardan 32 santımerge deıin aýytqýy sekildi shıki tirlikter tizbektelgen. Oblys ákimi óz baıandamasynda bul máselelerdiń ishinde bir­qatary oń sheshimin taýyp jat­qandyǵyn estirtken bolatyn. Al qosymsha baıandama jasaý úshin minberge shyqqan O.Ábdikárimov memleket tarapynan bar jaǵ­daı jasalǵanymen, óńirdegi at­qarylǵan jumystardyń kóńil kónshitpeıtindigine toqtalyp ótti. «Jergilikti atqarýshy organdar úshin memleket tarapynan meılinshe jaǵdaı jasalyp, zor múmkindikter berilgendigin bilemiz. Arnaıy baǵdarlamalar túzilip, bıýdjetten qarajattar da bólinýde. Biraq, jeń ushynan jalǵasqan sybaılas jemqorlyqqa qarsy kúreste partııa tarapynan baqylaýdy kúsheıtý kerek. Ásirese, aımaqtardaǵy qurylystar men memlekettik baǵdarlamalar aıasynda júrgizilip jatqan joba­larǵa jiti kóńil bólgen jón. Bizdiń qoǵamda sońǵy kezderi jalań uran, qurǵaq ýáde kóbeıip ketti. Mundaı kórinis bılik pen buqaranyń arasyndaǵy senimge selkeý túsirýi múmkin ekendigin eshkim de joqqa shyǵara almaıdy», dedi Oralbaı Ábdikárimuly. Nurlybek DOSYBAI, «Egemen Qazaqstan»