Basshylyq quramǵa – sertıfıkattar

Qorǵanys mınıstrliginde qorǵanys vedomstvosynyń basshysy Imanǵalı Tasmaǵambetov Qorǵanys mınıstrliginiń bas­shylyq quramyna Qazaq­stan­nyń Tuńǵysh Prezıdenti atyn­daǵy Ulttyq qorǵanys ýnıver­sıtetiniń bazasynda ótken kýrs baǵdarlamasyn aıaqtaǵany týraly kýálikti tabys etti. Ulttyq qorǵanys ýnıversıteti bas shtaby fakýltetiniń «Áskerı jáne memlekettik basqarý» mamandyǵy boıynsha magıstratýraǵa arnalǵan oqý baǵdarlamasynyń negizine súıengen áskerı óner kýrsy qyrkúıek pen maýsym aılary aralyǵynda ótti. Baǵdarlama tek strategııalyq jáne jedel-strategııalyq basqarý tobynyń basshylyq quramyna arnalǵan. Kýrs barysynda jaýyngerlik quram, Qarýly Kúshterdiń qurylymy, Qazaq­stan Respýblıkasynyń jáne shet memleketterdiń áskerı doktrınasy týraly jalpylama tanystyrýlar tolyǵymen qamtyldy. «Qurmetti general jáne ofıser myrzalar, búgin erekshe jaǵdaıda jınalyp otyrmyz. Bizdiń vedomstvonyń tarıhynda tuńǵysh ret Qorǵanys mınıstrliginiń basqarýshy quramyna bas shtab fakýltetiniń kýrstyq baǵ­dar­lamasyn bitirgeni týraly kýálik tapsyrýdamyz. Olar jyl boıy áskerı istiń qyr-syryn meńgerip, onyń erek­­sheligi men negizgi baǵyttaryn úı­ren­di. Bul oraıda, qujatty tapsyr­mas buryn barsha tyńdaýshylar aty­nan oqytýshylarǵa úlken alǵys bil­di­re­min. Ár dáristiń taqyryby maz­muny jaǵynan jáne kásibı turǵy­dan ózekti boldy. Tájirıbe júzin­de biz osyndaı oqytý pishimin alǵash ret qoldanyp otyrmyz. Onyń nátıjesiniń tıimdiligin túrli baǵyttan ańǵarýǵa bolady»,– dedi Qorǵanys mınıstri Imanǵalı Tasmaǵambetov. Kýrsty támamdaǵany jóninde kýá­likti Qorǵanys mınıstriniń qoly­nan Qorǵanys mınıstriniń birinshi orynbasary – Qazaqstan Respýblı­kasy Qarýly Kúshteri Bas shtabynyń bastyǵy, general-polkovnık Sáken Jasuzaqov, Qorǵanys mınıstriniń orynbasarlary general-leıtenant Oqas Saparov, general-maıor Talǵat Muhtarov, Nurlan Saýranbaev, Berik Sholpanqulov, Bilim jáne ǵylym departamentiniń bastyǵy Aıgúl Tólem­baeva aldy. Atalǵan kýrstarda zamanaýı áske­rı janjaldardyń mazmuny men máni, olardyń strategııalyq negizi men strategııalyq is-qımyl pishini oqy­­tyldy (Qarýly Kúshterde qol­danylýy). Sonymen qatar, Irak, Aýǵan­­stan, Ýkraına, Sırııadaǵy áskerı qaqty­ǵystardyń tájirıbesi negizinde soǵysty júrgizýdiń jańa tásilderi, áskerı saladaǵy zańnama zerdelendi. Endigi kezekte osyndaı kýrstar Bas shtab bastyǵynyń orynbasarlary, bas qolbasshylar, qolbasshylar, departament jáne basqarma bastyqtary úshin ótkiziletin bolady. «Egemen-aqparat»