«Altyn adam» barlyq óńirdi aralaıdy

Qazaqstan Respýblıkasy Ult­tyq mýzeıi ujym Táýel­siz­dik­tiń 25 jyldyǵyna oraı «Ult­tyq mýzeı seniń qalańda» taqy­ry­bynda mádenı týr jobasyn qol­ǵa aldy. Osy jobaǵa sáıkes al­ǵash­qy betashar shara Batys Qazaq­stan oblystyq ákimdiginiń qol­­daýymen Oral qalasynda bas­ta­lyp ketti. Mundaǵy mádenı týr baǵ­darlamalary úsh kúnge sozylmaq. Budan keıingi kezekte óz bas­taýyn Oral óńirinen alǵan atalmysh irgeli joba elimizdiń barlyq aımaǵyn qamtıdy dep kútilýde. О́ziniń máni men mazmuny, tarıhı qundylyǵy jáne kórýshiler men tamashalaýshylarǵa beretin áseri turǵysynan mádenı-tanymdyq saıahattyń mańyzdy tustary az emes. Sonyń biri ári biregeıi – Táýelsiz Qazaqstannyń brendine aınalǵan «Altyn adam» jádigeri deýge bolady. Osylaısha «Altyn adam», joǵaryda aıtylǵandaı, Táýelsizdigimizdiń 25 jyldyq torqaly toıyna deıin keń baıtaq elimizdiń barlyq túkpirin aralap ótedi dep josparlanyp otyr. Elimizdiń batys qaqpasynan, Eýropa men Azııa qurlyqtarynyń túıisken tusynan bastaý alǵan is-shara barysynda kórermen qaýym nazaryna «Ulttyq mýzeıge saıahat» jáne 3D grafıkalyq beınerolıkteri usynylmaq. Bul mańyzdy sharaǵa resmı tulǵalar, mýzeı isiniń mamandary jáne qalyń jurtshylyq ókilderi qaty­sady dep belgilengen. Ulttyq mýzeı – ótken tarı­hy­myz­dy baıyp­tap, rýhanı mura­myz­dy zerde­leıtin jáne búgingi damýy­myzdy baǵamdaıtyn iri mádenı ortalyq. Otany­myzdyń baı tarıhyn túgendeý, onyń baıandy dástúri men shejiresin tanystyrý, kóneni kózdiń qarashyǵyndaı saqtaý barsha qazaqstandyqtardyń aınymas paryzy ekeni belgili. Osy paryzdy uǵyndyrýǵa Ulttyq mýzeı qyzmetshileriniń tıgizip otyrǵan yqpaly az emes. Barsha otandastary­myz osy paryzdy tereń túısi­nip, tereń túrde zerdeleı alsa, Táýels­iz­digimizdiń qadir-qasıetin dáripteıtin jádiger­ler­diń tylsym syry da ǵasyrlar qoı­naýynan sýyrylyp ashyla túspek. Oral qalasynda bastalǵan mádenı týr jobasynyń ashylý rásimi kezinde oǵan jınalǵan kóp­­shilik qaýym «Al­tyn adam» eksponatyn tamashalady. Temir QUSAIYN, «Egemen Qazaqstan» ORAL