Jas maman aýylǵa barý úshin oǵan jaǵdaı jasaý kerek

Keshe S.Seıfýllın atyndaǵy Qazaq agrotehnıkalyq ýnıversıtetinde Memleket basshysy Nursultan Nazarbaevtyń Joldaýynda kórinis tapqan aýyl sharýashylyǵynda agrarlyq ǵylymdy damytý jáne kadrlardy daıarlaý máseleleri boıynsha Parlament Senaty depýtattarynyń ǵalym-agrarshylarmen kezdesýi ótti. Aýyl sharýashylyǵy salasynda bilikti mamandar daıarlaý máselesine baılanysty birqatar suraqtar kóterilgen mańyzdy kezdesýde Aýyl sharýashylyǵy vıse-mınıstri Ermek Kósherbaev sóz sóılep,  Parlament Senaty tarapynan Agrarlyq máseleler, tabıǵatty paıdalaný jáne aýyldyq aýmaqty damytý komıtetiniń tóraǵasy Sergeı Plotnıkov pen birqatar ókilder  oı-pikirlerin ortaǵa saldy. Sonymen qatar, QATÝ  rektory Aqylbek Kúrishbaev kelgen qonaqtardy oqý ornynyń jaı-kúıimen tanystyrdy. Bul rette, Sáken Seıfýllın atyndaǵy Qazaq agrotehnıkalyq ýnıversıtetine  qosh keldińizder, deı otyryp,   ýnıversıtet rektory  sońǵy jyldary  elimizde Parlament jáne Úkimettiń birlesýimen bilim jáne ǵylym salasyn reformalaý baǵytynda aıtarlyqtaı jumystar atqarylyp kele jatqanyn jetkizdi. Onyń aıtýyna qaraǵanda, bul baǵytta atalǵan oqý orny  josparly túrde álem boıynsha úzdik dep tanylǵan Batys ýnıversıtetteri júıesimen birge ilgerileýde. Sondaı-aq,  memleketimizde tuńǵysh avtonomdy oqý orny mártebesin ıelengen, bilim berý júıesi álemdik ǵylym-bilim keńistigimen biriktirilgen, zamanaýı zertteý ýnıversıteti – Nazarbaev Ýnıversıtettiń tájirıbesi basshylyqqa alynýda. Osy oraıda A.Kúrishbaev Elbasy atalǵan ýnıversıtetti álemdegi jetekshi joǵary oqý oryndary úlgisinde qura otyryp, Qazaqstannyń bolashaq ǵylymy men bilimin damytýdyń baǵyt-baǵdaryn kórsetip bergenin jáne sol úlgide  QATÝ-diń reformalaý satysyn bastaǵanyn kóldeneń tartty. Qazirgi tańda bilikti kadrlar daıarlaý máselesi Elbasynyń udaıy nazarynda turǵan basym baǵyttardyń biri,  ásirese, ekonomıkanyń mańyzdy salasy sanalatyn aýyl sharýashylyǵynda kásibı  mamandar daıarlaý búgingi kúnniń basty talaby bolyp otyr. Sondyqtan da osyndaı ózekti taqyryptar talqylanǵan mańyzy aıryqsha kezdesýlerdiń kóptegen is-sharalardy qolǵa alýǵa múmkindik jasaıtynyn alǵa tartqan Agrarlyq máseleler,  tabıǵatty paıdalaný jáne aýyldyq aýmaqty damytý komıtetiniń múshesi Rashıt Ákimov kúni búginge deıin  úshinshi ret ótkizilip otyrǵan basqosý osy saladaǵy birqatar máselelerdiń túıinin aǵytýǵa septigin tıgizerine senim bildirdi. Alǵashqyda aýyl sharýashylyǵy salasyndaǵy basym baǵyttar baǵdary sarapqa salynǵan dóńgelek ústel basynda birneshe máseleler qaralǵan bolsa, odan keıin Parlament tyńdaýy ótti.  Búgin, mine, aýyl sharýashylyǵy vıse- mınıstriniń  qatysýymen taǵy da kezdesý bolyp otyr, dedi R.Ákimov.  Onyń aıtýyna qaraǵanda, osy kezdesý barysynda ýnıversıtettiń aýyl sharýashylyǵy kadrlaryn daıyndaıtyn mamandarynyń materıaldyq-tehnıkalyq múmkindikterin jáne dáris oqý úderisterimen tanysý maqsaty kózdelgen. Erteden kele jatqan joǵary oqý ornynan kúni búginge deıin kóptegen jas túlep ushty. Biraq qazirgi tańda aýyl sharýashylyǵy salasynyń  mamandary jergilikti jerlerde jetispeıdi. Oǵan naqtylaı sebepter de joq emes, jastardyń ómir súrý standarttary ózgergen, sondyqtan mamandardy aýyldarǵa tartý úshin jaqsy jaǵdaılar jasalýy qajet. Sonymen qatar, kadrlar daıyndaý barysynda oqý men tájirıbeniń qatar júrýi úlken nátıje beretini eske salyndy. Jáne de aýyldarda  kadrlardyń jetispeýine baılanysty depýtattyq saýal joldanyp, osy máselede mamandardy aýylǵa tartý úshin yntalandyrý sharalary qolǵa alyný qajettigine nazar aýdaryldy. Elmıra MÁTIBAEVA, «Egemen Qazaqstan»