Júldegerler

Jaqynda Túrkııanyń Elazyq qalasynda túrki halyqtary aqyndarynyń «Hazar shıır aqshamlary» atty halyqaralyq poezııa festıvali ótti. 1992 jyldan bastap ótip kele jatqan bul jyr dodasy bıyl Álisher Naýaıdiń qurmetine arnaldy. Osyǵan deıingi ótken  festıvaldardyń biri Alashtyń ardaqty aqyny Maǵjan Jumabaev rýhyna arnalyp ótken eken. Elazyqtyń ákimdigi men Eýrazııa Jazýshylar odaǵynyń uıymdastyrýymen bolǵan osy aıtýly jyr festıvaline Qazaqstannyń Túrkııadaǵy elshiliginiń shaqyrtýymen elimizden «An-Arys» baspasynyń bas redaktory, aqyn Kádirbek Qunypııauly men «Móldir bulaq» jýrnaly bas redaktorynyń orynbasary, aqyn Saıat Qamshyger qatysyp qaıtty. Qazaqstan, Qyrǵyzstan, Ázer­baıjan, Tatarstan, Gagaýzııa, Túr­kııa, Kosovo, Irak sııaqty birneshe memleketten qatysqan aqyndar 4 kún boıy Elazyq qalasynyń aspanynda óleń-jyrdyń qusyn qalyqtatty. Ár aqyn óz týyndylaryn ana tilderinde jatqa oqydy. Bul jyr merekesi túrki halyqtarynyń týystyǵyn uǵyndyra túsetin, jany, tili, rýhy jaqyn aqyn­dardyń baýyrmaldyǵyn arttyratyn keremet shara boldy. Resmı ashylýda Elazyq qala­synyń basty kóshelerimen poezııa festıvaline qatysýshy aqyndar men uıymdastyrýshylar syrnaıla­typ, dabyldatyp, erekshe saltanatty jaǵ­daıda, qoldaryna tý kóterip jú­rip ótti. Bul saltanatty sherýdi ta­mashalaýǵa Elazyq qalasynyń halqynan bólek, Túrkııanyń basqa qala­larynan, shetelderden ónersúıer qaýym arnaıy kelgen eken. Ár kúnde túrli kezdesýler, bas­qosýlar, konferensııalar, dóńgelek ústelder, jyr keshteri ótip, máde­nıetter arasynda altyn kópir ornady. Kádirbek Qunypııauly men Saıat Qamshyger osy sharalardyń barlyǵynda Qazaqstandy, eldiń ádebıeti men rýhanııatyn pash etip, júrekterinen aqtarylǵan jyrlaryn tebirene oqydy. Hazar kóliniń jaǵasynda, otyz ǵasyrlyq tarıhy bar Harpýt qamalynda, Palý aýdanynda ótken basqosýlar da qazaq jyrynyń qudiretin tanyta túskeni ras. Qazaq poezııasyn túbi bir túrki elderine tanytýda aıryqsha eńbek etip kele jatqan Qazaqstannyń Túrkııadaǵy elshiligi aıtýly jyr merekesine qazaq aqyndaryn qatys­tyrý arqyly elder men elderdi, halyqtar men ha­lyqtardy jaqyn­dastyratyn taǵy da bir ıgi is jasady. Elimizdiń atynan jyr dodasyna baryp qaıtqan Kádirbek Qunypııauly men Saıat Qamshyger dıplomant atanyp, túrli syılyqtarǵa ıe bolyp, mereıleri tasyp oraldy.  «Egemen-aqparat»