«Eýro-2016»: Fınalǵa kim qalaı jetti? Derekter ne deıdi?

Euro-2016 saıtynda jarııalanǵan aqparǵa qaraǵanda, Fransııa quramasynyń bas jattyqtyrýshysy Dıde Desham Portýgalııa taktıkalyq jaǵynan ıkemdi, ıilgish komanda bolǵandyqtan, onyń qarsy shabýyly qaýipti dep esepteıdi. Al portýgaldar ustazy Fernandý Santýsh fransýzdar quramyndaǵy kez kelgen oıynshyny qaýipti dep otyr. Komandalardyń boljamdy starttyq quramdary mynadaı: Portýgalııa: Rýı Patrısıý; Sedrık, Pepe, Fonte, Gerreırý; Vıllıam Karvalıý, Adrıen, Joaý Marıý, Sanshesh; Nanı, Ronaldý. Al Pepeniń shyǵý-shyqpaýy belgisiz. Pepe belinen jaraqat alyp qalýyna baılanysty Ýelspen oıynǵa shyǵa almady. Biraq, Santýshtyń aıtýynsha, ol jeksenbi kúni aýyrý sezinbegen. Sol sııaqty Vıllıam Karvalıý jartylaı qorǵanystyń ortalyq shebinde Danılýdyń ornyna oınaıdy degen boljam bar. Fransııa: Lorıs; Sanıa, Kosselny, Iýmtıtı, Evra; Pogba, Matıýıdı; Sıssoko, Grızmann, Paıe; Jırý. Fransýzdar jartylaı fınalda Germanııamen oınaǵan quramymen shyǵady delinip otyr. Jergilikti baspasóz tek alańnyń orta shebinde N'Golo Kante paıda bolýy múmkin degen oıdy alǵa tartady. BAQ-tar sondaı-aq ótken oıyndaǵy senimsiz áreketinen keıin Dımıtrı Paıe zapasta qalýy múmkin ekenin jazyp jatyr. Portýgalııa quramasynyń bas jattyqtyrýshysy Fernandý Santýsh: -Men bizdiń maqsatymyz fınalǵa shyǵyp, onda jeńiske jetý ekenin budan buryn da aıtqanmyn. Biz qazir óz kúshimizge tolyq senimdimiz. Sondyqtan portýgal halqyn qýanyshqa bólegimiz keledi. Men sondaı-aq Fransııa quramasy týraly kóp tolǵap, aıtyp jatýdyń qajeti joq dep oılaımyn. Sebebi, jurt ony onsyz da jaqsy biledi. Men eń basynda Fransııa, Ispanııa jáne Germanııa tárizdi úsh favorıttiń bar ekenin mádimdegen bolatynmyn. Keıin basqa da úmitkerler shyǵa bastady. Solardyń qataryna Portýgalııa da kirdi. Eger men oryndaýshylar jaıyna kelsem, bizdiń olardyń árbiri mazasyzdandyrady. О́ıtetin bolsam, men Fransııa quramasy oıynshylaryn túgel atap shyqqan bolar edim. Olardyń árbiri oıynnyń taǵdyryn sheship ketýge laıyqty. Biraq Portýgalııa da kúshti komanda. Onda matchta qalaı jeńiske jetýge bolatynyn jaqsy biletin jarqyraǵan tulǵalar da bar. Fransııa quramasynyń bas jattyqtyrýshysy Dıde Desham: -Bizde Eýropa chempıony atanatyn múmkindik bar. Meniń 2000 jyly oıynshy retinde chempıonatty utyp alǵanym – ótkenniń isi. Qazir basqa tarıh keldi. Endi jattyqtyrýshy retinde sondaı qurmetke bólengim keledi. Ras, sol kezden qalǵan jaqsy, paıdaly tájirıbe bar. Sony paıdalanyp qalýǵa umtylamyn. Biraq men ótkendi aıta bergendi qalamaımyn. Endigi kezde tek osy shaq pen keler shaqtyń ǵana maǵynasy bar. Portýgalııa – óte kúshti, ol fınalǵa bekerden-beker shyqqan joq. Týrnırdiń basynda biz sekildi, portýgaldardy da jurt qatty synady. Biraq biz de, olar da fınalǵa shyǵa aldyq. Bul – taktıkalyq syzbasyn qarsylasyna qaraı ózgertip otyratyn óte tájirıbeli komanda. Ol qorǵanys shebinde óte senimdi oınaıdy. Portýgaldar joǵary qysymdy pressıng paıdalanbaıdy, biraq eki forvardynyń júıriktikterine arqa súıep, óte shuǵyl qarsy shabýyldarǵa shyǵyp turýǵa beıim. Reporterler kózqarastary Djo Ýoker, Portýgalııa (@UEFAcomJoeW) -Chempıonattyń basynda Islandııamen teń (1:1) oınaǵan Portýgalııanyń fınalǵa shyǵatyny eshkimniń qaperine kelgen joq. Biraq tap solaı bolyp shyqty. Esesine santýsh eń basynan óz komandasynyń týrnırdi utyp alatynyn aıtýmen boldy. Mine, ol soǵan bir qadam jerde tur. Pepeniń oralýy portýgaldardyń senimin arttyrady. Endi tek Pol Pogbaǵa qarsy oınaıtyn Vıllıam Karvalıý bola ma, álde Danılý bola ma, - sony ǵana sheship alý kerek. Eger Krıshtıaný Ronaldý vallıliktermen ótken jartylaı fınaldaǵy deńgeıinde oınasa, portýgaldar óz ómirlerindegi tuńǵysh trofeılerin osy joly utyp alady. Devıd Krossan, Fransııa (@UEFAcomDavidC) -Fransýzdar óz armandaryn is júzine asyrý úshin bul fınaldy utýǵa mindetti. Deshamnyń komandasy bıylǵy jyly kóptegen problemalarǵa tap keldi. Biraq soǵan qaramastan, udaıy jaqsy oıyn kórsetip otyrdy. Fransýzdar bettegen joldarynan aýytqymaı, ilgeri jyljı berdi. Qazir endi komanda Antýan Grızmann keıpindegi jańa juldyzǵa qol jetkizdi. «Úsh tústilerdiń» jeńiske jetýlerine jankúıerler qosatyn úles te az bolmaıdy. Siz bilesiz be? Ronaldý men golkıper Rýı Patrısıý osy chempıonattaǵy oıyn eń kóp – 600 mınýt ýaqytty alańda ótkizgen oıynshylar bolyp tabylady. Match týraly málimetter

• Bul fınaldyq oıynǵa deıin Fransııa quramasy Eýropa chempıonatynda eki ret jeńiske jetken.
• Portýgalııa ekinshi márte fınalǵa shyǵyp otyr. Ol 2004 jyly óz elinde ótken qurlyq chempıonatynyń fınaldyq kezdesýinde Grekııa komandasyna jol berip qoıǵan edi.

Match ótetin jer Ol Parıj túbindegi Sen-Denı qalasyndaǵy «Stad-de-Frans» stadıonynda oınalady. 80 000 oryndyq bul sport arenasy 1997 jylǵy 1 qańtar kúni ashylǵan bolatyn. Matchqa qazylyq etýshiler Match referıi: Mark Klattenbýrg (Anglııa), referı kómekshileri: Saımon Bek (Anglııa), Djeık Kollın (Anglııa). Tórtinshi referı: Vıktor Koshshoı (Majarstan). Qosymsha referı kómekshileri: Entonı Teılor (Anglııa), Andre Marrıner (Anglııa). Komandalardyń buǵan deıingi kezdesýleri Fransııa – Portýgalııa quramalary osy kezge deıin ózara 24 ret kezdesken. Sonyń 18-inde Fransııa, 5-inde Portýgalııa jeńip, 1 oıyn ǵana teń aıaqtalǵan. Dop aıyrymy: 49 – 28, fransýzdardyń paıdasyna. Fransııa portýgaldardy sońǵy 10 kezdesýinde de utqan bolatyn. Osymen onyń bul komandaǵa qatysty jeńisti joly 40 jyldan astam ýaqyttan beri jalǵasyp keledi. Damır QOJAMQUL