Almaty oblysynda ákim kómekshisi alaıaqtyǵy úshin sottaldy

Almaty oblysynda Ile aýdany ákiminiń kómekshisi men ákimdiktiń bas mamany alaıaqtyq áreketteri úshin sot júzinde jaza aldy. Almaty oblystyq soty baspasóz qyzmetiniń málimetinshe, sottalýshylar oryndyǵyna Ile aýdany ákiminiń kómekshisi M. Jumaǵulov pen «Ile aýdany ákimi apparaty kásipkerlik bólimi» memlekettik basqarmasynyń bas mamany F. Erqojanova otyrǵan. Baspasóz qyzmetiniń deregine qaraǵanda, M. Jumaǵulov óziniń qyzmettik jaǵdaıyn paıdalana otyryp, «jeńil jolmen keletin aqsha» jasaǵysy kelgen. Sóıtip, bir azamatshanyń senimine kirip, oǵan maqsatty jer telimderine ózgeris engizip, qosymsha jer alyp berýge ýáde bergen. Buǵan qosa, kómekshi zardap shegýshini memlekettik organdar tarapynan bolatyn barlyq tekseristerden qutqaryp qalýǵa ýáde etken. Biraq ol óziniń bul ýádelerin oryndaı almaı, iske joǵaryda atalǵan bas mamandy qosqan. Sol kezde Jumaǵulov Erqojanovaǵa zardap shegýshiden jer telimin ózgertip berý jóninde ótinish jazdyrtyp alýdy tapsyrǵan. Nátıjesinde ol 21 000 AQSh dollary (3 937 500 teńge) kóleminde zardap shekken. Ile aýdandyq soty «qıturqy áreketter» jasaýshylardy bostandyqtaryn shekteý túrinde jazalaýǵa úkim shyǵardy. Osylaısha ákimniń kómekshisi M. Jumaǵulov dúnıe-múlikteri tárkilene otyryp, 3 jyl 2 aıǵa sottalýǵa jáne ómir boıy memlekettik qyzmet jasaý quqynan aırylýǵa kesildi. Bas maman F. Erqojanova dúnıe-múlikteri tárkilene otyryp, 3 jylǵa sottalýǵa jáne ómir boıy memlekettik qyzmet jasaý quqynan aırylýǵa kesildi. Úkim zańdy kúshine engen joq. Nurbol ÁLDIBAEV