Qasym kýbogy – qaraǵandylyqtarda

Taıaýda arqa tórinde Astana-Qaraǵandy qalasynyń ónerpazdarynan quralǵan komandalar arasynda shaǵyn fýtboldan V «Qasym» kýbogy sarapqa salyndy. Kezekti dop dodasy Táýelsizdigimizdiń 25 jyl­dy­ǵyna jáne Alash arysy Álıhan Bókeıhanovtyń 150 jyldyǵyna arnaldy. «Eń birinshi, shahtaly sha­harǵa qosh keldińizder. Qasym Amanjolov atyndaǵy týrnır taǵy da óziniń jalǵasyn taýyp jatyr. Bul jarysty uıym­dastyrýdaǵy negizgi maqsat – Astana óner juldyzdary men Qaraǵandy ónerpazdarynyń arasyndaǵy dostyqty odan ári nyǵaıta túsý. Osy úrdisti úzip almaı, jyl saıyn jınalyp tursaq, bul da birligimizdiń bir belgisi emes pe?», – dedi aıtysker aqyn Aıtbaı Jumaǵulov. Ádebıet pen mádenıet ókil­derin kók alańnan kórý qyzy­ǵarlyq dúnıe boldy. Olaı deı­tinimiz, olar tek án aıtyp, dombyra tartyp, qoıylym qoıyp qana emes, ala dop alamanynda da alǵyrlyq tanyta alatynyn baıqadyq. Qos qalanyń namysyn qorǵaımyz dep kelgen qos komandanyń shıraq qımyly men sheber ádisteri «á» degennen kórine bastady. Birinshi bólimdi, ıaǵnı alǵashqy 45 mınýttyń aıaq alysyna aqyn Rýslan Nurbaı kom­mentatorlyq jasap, oıynnyń barysyn ázil aralastyryp, áń­gimelep otyrdy. Al ekinshi taımda kommen­tatorlyqtyń tizginin «Qasym» ádebı-qoǵamdyq jýrnalynyń bas redaktory Serik Saǵyntaı ustap, eki komandanyń oıyn órnekterin syrly sózben sý­rettedi. Onyń «Alda júrgen Aıtbaı ma, qorǵanysqa qaıtpaı ma?» dep uıqastyra sóılegenine kó­rermender qol soǵyp, bir kúlip aldy. +35 gradýs ystyqqa qaramastan, sońǵy bólimge be­rilgen 45 mınýt oıyn joǵary dárejede ótti. Degenmen, jarys bar jerde jeńis te, jeńilis te bar emes pe? Sonymen, bir jarym saǵatqa sozylǵan dop dodasy alań ıeleriniń paıdasyna sheshildi. Eki taımda da erekshe ekpin tanytqan elordalyqtardyń eńsesi túsken joq. Jalpy, qorytyndy boıynsha 3-2 esebimen basym túsken Qaraǵandy qalasynyń komandasy kýboktyń ıesi atandy. Basqa oıynshylarǵa ártúrli atalym bo­ıynsha marapat qaǵazdary tabys etildi. Dálirek aıtsaq, «О́zge emes, ózim aıtam óz jaıymdy...» Úzdik bapker – Mıras Quttybaı (Qaraǵandy oblysy, Jastar saıasaty jónindegi basqarma basshysy), «Jas dáýren, rızamyn men saǵan...» Eń ádemi gol – Nurbek Ádilbek (Astana qalasy «Jastar» teatrynyń akteri), «Kúrkirep kúndeı ótti ǵoı soǵys...» Úzdik qaq­pashy – Muratbek Beısenbaev (Astana qalasy Qýyrshaq teatry­nyń akteri), «О́rtke tıgen daýyldaı...» Úzdik shabýylshy – Qaınar Áletaev («Bazar joq» teatrynyń akteri), «Men qalǵan bir atanyń ǵasyrymyn...» Úzdik oıynshy – Ádil Ahmetov (Astana qalasy Jastar teatrynyń ak­teri), «Sharlaǵan jolym jatyr jer betinde...» Úzdik jartylaı qorǵaýshy – Bek Shmat (Astana qalasy. Aıtysker aqyn), «Qııalym qaqty qanat...» Úzdik jankúıer – Maral Dadıeva (Qara­ǵandy memlekettik ýnıver­sı­teti, Qazaq tilin damytý orta­lyǵynyń mamany), «Túsirgen oı sáýlesin shartarapqa...» Úzdik uıymdastyrýshy – Marǵulan Ýálı («Bazar joq» teatrynyń ssenarısi), «Qolymda naıza, shaǵylyp aıǵa...»Úzdik qorǵaýshy – Almaz Myrzahmet (aqyn, jazýshy, «Qasym» respýblıkalyq ədebı-qoǵamdyq jýrnalynyń jaýapty hatshysy, E.Bóketov atyndaǵy Qaraǵandy memlekettik ýnıversıtetiniń oqytýshysy). Uıymdastyrýshylardyń uı­ǵarymy boıynsha atalmysh ala­mannyń kelesi kezdesýi Jezqazǵan jerinde ótedi dep josparlanýda. Raýan QAIDAR, «Egemen Qazaqstan» QARAǴANDY