«Jibek joly-2016» jarty jolǵa jetti

8 shildede Máskeýden attanǵan «Jibek joly» rallı-marafonyna qatysýshylar Qazaqstan aýmaǵyn basyp ótip, Qytaı jerindegi 8-kezeńge jetti. Bas-aıa­ǵy 16 kezeńnen turatyn marafon  24 shil­dede Beıjińde márege jetýge tıis. Jol talǵamaıtyn kólikter arasynda Qazaqstan jerinde úzdik nátıje kórsetken Sırıl Depre ázir kósh basyn eshkimge berer emes. Ol óziniń basty qarsylasy Sebasten Lıobten ýaqyt aıyrmashylyǵyn 7 mınýtqa deıin jetkizdi. Jerlesimiz Aıdyn Raqymbaevtyń ekıpajy Depreden 20 mınýtqa qalyp keledi. Júk kólikteriniń jarysynda M.Van den Brınk ekıpajy ekinshi kele jatqan Kozlovskıı ekıpajynan 20 mınýtqa uzap shyqty. Uıymdastyrýshylardyń aıtýynsha, «Jibek joly-2016» álemdik rallı-marafondardyń ishindegi eń uzaǵy. Ańyzǵa aınalǵan «Parıj-Dakar» kópkúndiginiń ózi 9 300 shaqyrym bolsa, «Jibek jolynyń» qashyqtyǵy 10 700 shaqyrymǵa teń. Oǵan qosa, bul kópkúndik ótetin joldyń bederi de sportshylarǵa beıtanys eken­digi jarysty odan saıyn qıyndatty hám tartymdylyǵyn da arttyra tústi. Buǵan deıin Máskeýden shyqqan kólikter Ýfaǵa soǵyp, odan soń Qostanaı arqyly Astanaǵa atbasyn tiregen-di. Elordadan Balqashqa jetip bir aıaldap, Almatyǵa atbasyn tiregennen keıin Qytaı jerine ótti. Jaqyn kúnderi Gobı shólin artta qaldyrýǵa tıis. «Jibek joly-2016» rallı-marafonyna álemniń 40 eliniń 92 júk talǵamaıtyn kóligi, 24 júk kóligi qatysyp jatyr. Olardyń arasynda qazaqstandyq 7 ekıpaj da bar. Buǵan deıin «Davar» rallı-marafonynda birneshe márte top jarǵan Sebasten Lıob, Stefan Petronsel, Sırıl Depre syndy avtosport áleminiń sańlaqtary «Jibek jolynda» da alǵashqy oryndardy eshkimge berer emes. Arnur ASQAROV, «Egemen Qazaqstan»