Aýylyn abattandyrǵan aqyn

Úlken Qaratal aýylynda Orazbaı Esdáýletov saıabaǵy ashyldy Saýyr, Saıqandaı seńgir taýlar baýyryndaǵy Zaısan aýdanynyń Úlken Qaratal aýylynda Uly Otan soǵysynyń ardageri jáne uzaq jyl bilim berý salasynda eńbek etken ustaz Orazbaı Esdáýletovtiń atynda saıabaq ashylyp, Zaısan qalasynda ózi turǵan úıge eskertkish taqta ornatyldy. Esdáýletovter áýletiniń uıymdastyrýymen ótken ashylý saltanatyna oblys ákiminiń orynbasary Jaqsylyq Omar, jas aqyn Qalqaman Sarın jáne aýyl turǵyndary qatysty. Qazaqta tek degen keremet uǵym bar. Ulyqbek Esdáýlet pen Gúlnár Salyqbaeva syndy qazaqtyń kórnekti aqyndaryn syılaǵan áýlettiń týǵan jerge taǵzym etip, aıadaı aýyl­dy abattandyrýǵa úles qosýy­nyń tárbıelik máni zor. Iаǵnı, qarapaıym eńbegimen el yqy­lasyna bólengen Orazbaı aqsaqaldyń balalary áke qo­lymen otyrǵyzylǵan máýeli baqty qorshap, balalardyń oıyn alańyn salyp berdi. Úl­kenqarataldyq turǵyndar baý aýmaǵynda buryn mektep bol­ǵanyn aıtady. Orazbaı qart qaı jaqqa barsa da túrli jemis aǵashtarynyń kóshetterin tamyr-topyraǵymen atyna óńgerip ákelip, mektep aýla­syna otyrǵyzyp, býdandas­tyrýdy jany súıetin adam bolypty. Alaıda, 1990 jyly Zaısan jerindegi zilzaladan keıin mektepti qaıta salýǵa bas­qa oryn tańdalyp, atalǵan baý qa­­raýsyz, mal kóleńkeleıtin orynǵa aınalǵan. Mine, osy áke baǵyn jańartyp, saıabaqqa aı­nal­dyrǵan Esdáýletovterdiń ıgilikti isine aýyldastary sheksiz rızashylyqtaryn bildirdi. – Baıaǵyda Qyzylordanyń Aralynda týyp-ósken dosym Jarasqan Ábdirash Zaısanǵa kelgeninde: «Mundaı shuraıly, kórkem jerde týǵan ekiniń biri aqyn bolmaı qaıtedi? Myqty bolsańdar qumnan basqa túgi joq Araldan shyǵyp óleń jazyp kórińder», dep ázildegeni bar. Rasynda, dúnıeniń qaı shetinde bolsam da, týǵan topyraǵyma jeter jer joqtyǵyn baıqadym. Túgin tartsa maıy shyǵatyn shuraıly ólkede qada qaqsa kóktep, ósip ketedi. Qazir Astananyń shetindegi keń dalany qalyń ormanǵa aınaldyryp, arasyna qyrǵaýyldan bastap túrli janýardy jiberip jatyr. Bul óte taǵylymdy is. «Atadan mal qalǵansha, tal qalsyn» deıdi. Sizder de osy jumaq mekende aǵash ekseńizder quba-qup, – dedi aýyl­das­taryna Ulyqbek Esdáýlet. Al O.Esdáýletovtiń Zaısan qala­synda turǵan úıine orna­tylǵan memorıaldyq taqtany osy áýlettiń taǵy bir talantty týmasy, ómirden erte ótken teatr rejısseri Rústem Esdáý­lettiń otbasy ashty. Jıyn sońynda Zaısan aýdanynyń ákimi Temirbek Qasymjanov týǵan jerdi kórkeıtýge úles qosqan azamattardy Alǵys hatpen ma­rapattap, jerlesteri aqyn Ulyq­bek Esdáýletke tulpar mingizdi. Dýman ANASh, «Egemen Qazaqstan» Shyǵys Qazaqstan oblysy, Zaısan aýdany Sýretti túsirgen Marat Salbanov