Chempıondar lıgasynyń ekinshi irikteý kezeńinde «Astana» óz alańynda Lıtvanyń «Jalgırıs» komandasyn qabyldady.
Jankúıerler bul keshte tartysty básekeniń kýási boldy. Qos qaqpaǵa uıymdastyrylǵan alma kezek shabýyldar qaýipti aıaqtalyp jatty.
«Astana» oıyndy shıraq bastady. Júıeli oıyn kórsetip, shabýyldarǵa jıi shyǵyp turdy. Al «Jalgırıs» oıynshylary kezdesýdiń bul bóliginde negizinen qorǵanýmen boldy. Nenad Erıchtiń qaqpasyn bir-eki ret nysanaǵa alyp kórgenmen, degenderine jete almady.
Esesine alań ıeleri kezekti shabýylynda esep basyn ashty.
Buryshtamadan Patrık Tvýmasıdiń áýeletken dobyna alǵash bolyp jetken Marın Anıchıch óz komandasyn osylaısha alǵa shyǵardy.
Osydan soń birqatar qaýipti sát oryn alǵanmen, alǵashqy taım 1:0 esebimen qaldy.
Oıynnyń ekinshi bóliginde jattyqtyrýshydan jańa nusqaýlar alǵan «Jalgırıs» oıynshylary bastapqy mınýttarda alań ıeleriniń adymyn ashtyrmady. Jańadan órbip kele jatqan shabýyldaryna toıtarys berip, dopqa talas kezinde basymdyǵyn kórsetti.
Jergilikti komandanyń kapıtany Tańat Nóserbaev jaraqatyna baılanysty alańnan ketýine májbúr boldy. Mine, osydan keıin qonaqtar qarqynyn odan saıyn údetti. Nátıjesinde 57-mınýtta Elıveltonyń soqqysynan keıin tarazy basy teńesti.
Teń esep «Astana» úshin tıimsiz edi. Sebebi, esep ózgerissiz qalsa, kelesi irikteý kezeńinde «Jalgırıs» óner kórsetedi. Osyny qaperinde saqtaǵan alań ıeleri baryn salyp shabýyldady.
Qonaqtar ýaqyt sozý úshin bárin jasady. Ádettegideı, dopqa talas kezindegi jaǵdaıda sımýlıasııaǵa jol bergen kezderi de boldy.
Biraq «Astana» tipti, Chempıondar lıgasynyń fınalynda óner kórsetken «Atletıko» komandasyna da «Astana Arena» stadıonynda ese jiberip kórmegen. Bul matchta da sońǵy mınýttarǵa deıin múmkindikterin múlt jibermeýge tyrysty.
Nátıjesinde, negizgi 90 mınýt aıaqtalǵannan keıin qosymsha berilgen 3 mınýttyń 2-mınýtynda jeńisti goldy soqty. Tartysty sátterdiń birinde Marın Anıchıch óziniń ekinshi dobyn «Jalgırıs» qaqpasyna toǵytty.
Der kezinde shabýylǵa aralasqan Marın Anıchıch eki goldyń avtory atanyp, óz komandasyn osylaısha kelesi kezeńge alyp shyqty.
«Jankúıerler
– komandanyń on ekinshi oıynshysy» dep bosqa aıtylmaǵan bolsa kerek. Olardyń keremet qoldaýy «Astananyń» kelesi kezeńge ótýine úlken septigin tıgizdi.
Búgin «Seltık» (Shotlandııa) pen «Lınkoln» (Gıbraltar) arasynda jaýapty kezdesý ótedi. Bul oıynda qajetti nátıjege qol jetkizgen komanda «Astananyń» kelesi qarsylasy atanady. Aıta keterligi, alǵashqy oıynda «Lınkoln» 1:0 esebimen jeńiske jetken bolatyn.
Aıan ÁBDÝÁLI
Foto: Erlan OMAROV
